Oʻzbekistonda Leapmotor brendi ostidagi avtomobillarni shartli ravishda import qilishga ruxsat berildi. Bu haqda Texnik jihatdan tartibga solish agentligi va UzTest markazi maʼlum qildi.

Organ xabariga koʻra, 14-aprel kuni Pskentdagi laboratoriyada qayta sinovlar oʻtkazilgan va ijobiy natija bergan. Bozorga kirish uchun Leapmotor kompaniyasiga quyidagi talablar qoʻyilgan:

  • avtomobillarning aniqlangan nomuvofiqliklarini bartaraf etadigan va isteʼmolchilarga yetkazilgan zararni qoplaydigan rasmiy vakil — Oʻzbekiston rezidenti boʻlgan yuridik shaxsni tayinlash;

  • respublikaga Leapmotor tovar belgisi ostida olib kiriladigan barcha transport vositalarining turlarini maʼqullash uchun barcha zarur hujjatlarni taqdim etish.

Shuningdek, kompaniya ushbu brend ostida avtomobil ishlab chiqaruvchi zavodlarda ishlab chiqarish jarayonlari va sharoitlarini oʻrganish va baholash majburiyatini olgan.

Oʻzbekistonda Leapmotor sertifikatini olish uchun arizalar S16 modelida aniqlangan qoidabuzarliklar tufayli toʻxtatildi. Ushbu transport vositasi tomonidan yaratilgan elektromagnit xalaqitlar darajasi ruxsat etilgan meʼyordan 16 baravar yuqori.