O‘zbekistonda yo‘nalishli transport uchun ajratilgan yo‘laklarda soat 23:00 dan 06:00 gacha boshqa avtotransport vositalari harakatlanishi mumkin bo‘ladi. Shuningdek, «To‘xtash taqiqlangan» va «To‘xtab turish taqiqlangan» belgilarini o‘rnatish qayta ko‘rib chiqiladi. Bu haqda prezident matbuot kotibi xabar berdi.
Hozirda boshqa transport vositalari «A» toifadagi yo‘laklarda harakatlana olmaydi. Biroq, barcha avtobuslar soat 23:00 gacha o‘z yo‘nalishlarini tugatishi sababli, rasmiylar ushbu vaqt oralig‘ida boshqa transport vositalariga ushbu yo‘nalishlarda harakatlanishga ruxsat berishga qaror qilishdi.
Qayd etilishicha, bu haydovchilarga qo‘shimcha qulayliklar yaratishga yordam berishi kerak. Xususan, soat 23:00 dan 6:00 gacha ushbu yo‘laklarda harakatlanish qoidabuzarlik hisoblanmaydi.
Rasmiylar, shuningdek, turli joylarda bunday belgilarni o‘rnatishning asosliligini qayta ko‘rib chiqadilar. Kerak bo‘lmagan joylarga o‘rnatilgan belgilar olib tashlanadi. Shu bilan birga, rasmiylar tegishli belgilarning amal qilish vaqtini ko‘rsatadigan qo‘shimcha axborot taxtachalarini o‘rnatadi.
Qayd etilishicha, ushbu belgilarda ko‘rsatilgan vaqtdan tashqari vaqtlarda haydovchilar avtomobillarini to‘xtatib, to‘xtab turishlari mumkin bo‘ladi. Masalan, «To‘xtash taqiqlangan» belgisi ostiga «7:00 – 21:00» vaqti ko‘rsatilgan taxtacha qo‘yilgan bo‘lsa, bu joyda 21:00 dan 7:00 gacha bemalol to‘xtab turish mumkin va bu qoidabuzarlik hisoblanmaydi.
