O‘zbekistonda renovatsiya loyihalari xususiy biznes ishtirokida va faqat aholining roziligi bilan amalga oshiriladi. Bu haqda Qurilish vazirligi rahbari Sherzod Hidoyatovga tayanib, “Gazeta.uz” xabar berdi.
Renovatsiya ishlari bosqichma-bosqich bo‘lib, tadbirkorlar va mahalliy aholining tayyorgarligiga bog‘liq.
“Renovatsiya tadbirkorlar bilan birgalikda ham amalga oshirilmoqda. Bu yerda har ikki tomonning roziligi muhim. Biz Toshkentdagi renovatsiya zonalari haqidagi ma’lumotlardan foydalanish imkoniyatini allaqachon ochganmiz. Endi ularni ham raqamlashtiramiz va barcha viloyatlardagi shaharlar uchun yangi bosh rejalarni ochamiz — Toshkent misolidek”, — dedi u.
Investor qurilishni boshlashdan oldin muayyan hududning bosh rejasini ishlab chiqishi va aholi bilan kelishib olishi shart. Bundan tashqari, vazir renovatsiya bo‘yicha qonun ustida ish davom etayotganini tasdiqladi.
“Hozir qonun ustida ish olib borilmoqda. Biz uni Adliya vazirligi va Oliy Majlis deputatlari bilan birgalikda ishlab chiqmoqdamiz. Ammo bu rivojlanish jarayoni qonunni kutish bilan to‘xtashi kerak degani emas — asosiy shartga rioya qilgan holda loyihalarni ishga tushirish imkonini beruvchi vaqtinchalik mexanizmlar mavjud: loyihalar faqat aholi roziligi bilan amalga oshirilishi mumkin”, — dedi vazir.
