Toshkentda real vaqt rejimida avtomobillar harakatini kuzatadigan, vaziyatni tahlil qiladigan va tirbandliklarni bashorat qiladigan sun’iy intellektga asoslangan transport platformasi ishga tushirildi. Bu haqda YHXBB xabar bermoqda.
Platforma kuzatuv kameralari bilan birlashtirilgan va ko‘chalarda xavfsizlikni oshirish orqali hodisalarga tezkor javob berish imkonini beradi. Sun’iy intellekt nafaqat qoidabuzarliklarni qayd etishi, balki tirbandlik va avariyalar sabablarini tahlil qilishi, xizmatlarga tezroq qaror qabul qilishga yordam berishi mumkin.
Yangi tizimdan foydalanish tirbandliklar sonini 50 foizgacha qisqartirish, YTHlar sonini kamaytirish va favqulodda xizmatlar ishini tezlashtirish imkonini beradi.
Tizim YPX brigadasi binosi kapital ta’mirlangandan so‘ng ochilgan Toshkent shahar IIBB YHXB huzuridagi yangi situatsion monitoring markazi tarkibida ishga tushirildi.
Shu kuni xizmatga kameralar va Monitoring markazi bilan masofaviy aloqa tizimi bilan jihozlangan 40 ta yangi Cobalt avtomobili topshirildi. Mashinalardan tezkor choralar ko‘rish va qoidabuzarliklarni qayd etish uchun foydalaniladi.
