O‘zbekiston fuqarosi Ukrainadagi mojaroda Rossiya tomonida ishtirok etgani uchun sudlandi. Bu haqda jinoyat ishlari bo‘yicha Romitan tuman sudi hukmiga tayanib, “Gazeta” yozmoqda.
2018-yil iyul oyida erkak Qozog‘iston orqali Voronejga ishlash uchun ketgan. U yerda O‘zbekiston fuqaroligini yo‘qotmagan holda Rossiya fuqaroligini olgan. 2024-yil may oyida u Samarada ilgari sodir etgan jinoyati uchun hibsga olingan va tergov izolyatoriga joylashtirilgan.
U yerda unga jazodan ozod qilish va 2 million rubl miqdorida pul mukofoti evaziga 2024-yil 17-iyuldan 2025-yil 17-iyungacha Ukrainadagi jangovar harakatlarda ishtirok etish uchun Mudofaa vazirligi bilan shartnoma tuzish taklif qilindi.
Erkak shartnoma imzoladi, shundan so‘ng u boshqa yollanma askarlar bilan birga Luganskka jo‘natildi. 27-iyul kuni u harbiy bazaga raketa hujumi natijasida yaralangan va kasalxonaga yotqizilgan edi. U salomatligi tufayli 45 sutka muddatga vaqtincha xizmatga yaroqsiz deb topilgan.
Chiqarilgandan so‘ng u jangovar harakatlarda qatnashgani uchun 3 million rubl miqdorida to‘lov oldi, uning ko‘rsatmalariga ko‘ra, bir qismini hujjatlarni rasmiylashtirishda yordam bergan Husniddin ismli shaxsga bergan. Samaraga qaytgach, u jangovar harakatlar paytida yo‘qolgan Rossiya pasportini tikladi.
Tanish huquqshunos ayol unga urushga qaytishi kerakligi sababli qidiruv e’lon qilinishi mumkinligi haqida ogohlantirganidan so‘ng, erkak Rossiyani tark etishga qaror qilgan. 2024 yil dekabr oyida u O‘zbekiston pasportidan foydalangan holda Samara – Toshkent aviareysida O‘zbekistonga qaytib kelgan.
Uning mobil telefoni ko‘zdan kechirilganda Rossiya harbiy prokuraturasi bilan moddiy yordam olish masalalari bo‘yicha yozishmalar, gospitallardan tibbiy ma’lumotnomalar, shuningdek, uning jangovar harakatlarda ishtirok etganini tasdiqlovchi hujjatlar topilgan.
Respublika sud-tibbiy ekspertiza markazi Buxoro filiali xulosasiga ko‘ra, erkakda yengil tan jarohati toifasiga kiruvchi oskolkalardan olingan jarohatlar bo‘lgan.
Sudda sudlanuvchi aybiga iqror bo‘lib, pushaymonligini bildirdi. Uning ma’lum qilishicha, 2019-yilda Xorazm viloyatida yashovchi fuqaroga Nexia avtomobilini sotgan, keyinroq mast holatda xaridorni o‘t o‘chirgich bilan ikki marta urib, qochib ketgan.
2024-yilda u Rossiya politsiyasi tomonidan qo‘lga olingan. Hibsxonada bo‘lganida, u urushda qatnashishga rozi bo‘ldi. Olingan pullarning bir qismini, uning so‘zlariga ko‘ra, oilasiga o‘tkazgan.
Sud erkakni Jinoyat kodeksining 154-moddasi 1-qismi (yollanish) bilan aybdor deb topdi. Unga umumiy tartibli koloniyada 5 yil muddatga ozodlikdan mahrum qilish jazosi tayinlandi.
