17-iyul kuni O‘zbekiston tashqi ishlar vaziri Baxtiyor Saidov Afg‘oniston ichki ishlar vaziri vazifasini bajaruvchi Xalifa Sirojiddin Haqqoniy bilan uchrashdi. Bu haqda O‘zbekistonning yuqori martabali mulozimi Telegram kanalida ma’lum qildi.
Tomonlar xavfsizlik, huquqni muhofaza qilish va mintaqaviy barqarorlikni ta’minlash sohalarida mamlakatlar o‘rtasida kengayib borayotgan hamkorlikni muhokama qildi.
“Afg‘oniston Ichki ishlar vazirligining mamlakatdagi xavfsizlik bilan bog‘liq vaziyatni sezilarli darajada yaxshilash va giyohvand moddalar ishlab chiqarishga qarshi kurashish borasidagi sa’y-harakatlarini alohida qayd etdik”, — deya qo‘shimcha qildi Baxtiyor Saidov.
Bundan tashqari, Afg‘oniston tashqi ishlar vaziri vazifasini bajaruvchi Mavlaviy Amir Xon Muttaqiy bilan uchrashuv bo‘lib o‘tdi.
Uchrashuvda tomonlar mintaqaviy o‘zaro bog‘liqlik, suv resurslarini birgalikda boshqarish, iqtisodiy hamkorlik, ta’lim va madaniy merosni qayta tiklashni qo‘llab-quvvatlashda qat’iy ekanliklarini tasdiqladi.
18-iyul kuni Baxtiyor Saidov Afg‘oniston bosh vaziri vazifasini bajaruvchi Mulla Muhammad Hasan Oxund bilan uchrashib, O‘zbekistonning qardosh qo‘shni bilan munosabatlarni chuqurlashtirishga sodiqligini yana bir bor tasdiqladi.
“Savdo-iqtisodiy va gumanitar hamkorlikni kengaytirish, o‘zaro bog‘liqlikni rivojlantirish, jumladan, mintaqaviy integratsiya yo‘lidagi muhim qadam — O‘zbekiston–Afg‘oniston–Pokiston temir yo‘lini qurish bo‘yicha Hadli bitimni imzolash masalalari muhokama qilindi”, — deb yozdi TIV rahbari.
O‘zbekiston hukumati infratuzilma, logistika, energetika va ta’lim sohalarida sheriklikni mustahkamlashga tayyor va Afg‘oniston Markaziy va Janubiy Osiyoni bog‘lovchi ko‘prik bo‘lishi kerak, deb hisoblaydi.
