Bloger Saodat Abduzakirova Angrenda bir necha kishi 14 yoshli qizni zo‘rlagani haqida gapirdi. Holat yuzasidan Bolalar ombudsmani va Ijtimoiy himoya milliy agentligi munosabat bildirdi.
Abduzakirovaning so‘zlariga ko‘ra, 2024-yilning yozida 14 yoshli qizni qandaydir “qarindoshi” zo‘rlagan. Jabrlanuvchining rasmiy hujjatlarda ota sifatida qayd etilmagan otasi Rossiyada ishlab yuribdi. Qizning onasi uning tarbiyasida ishtirok etmaydi.
Taxminlarga ko‘ra, avgustdan oktyabrgacha ixtisoslashtirilgan maktabda o‘qiydigan va buvisi bilan yashaydigan qizni to‘rt kishi zo‘rlagan, ulardan biri voyaga yetmagan. U muntazam ravishda shafqatsiz zo‘ravonlik va tahdidlarga duchor bo‘lgan.
Jarohatlar natijasida qiz fevral oyida shifoxonaga yotqizilgan. Uning ahvoli vaqti-vaqti bilan yomonlashib, davolanishga qaytadi. Shifoxona shifokorlari ma’lumotni huquq-tartibot idoralariga yetkazgan va jinoyat ishi qo‘zg‘atilgan. Tergovchining so‘zlariga ko‘ra, tergov yakuniy bosqichda. Kompleks ekspertiza o‘tkazish rejalashtirilgan, shundan so‘ng ish sudga oshiriladi.
Angren shifoxonasi shifokorlarining so‘zlariga ko‘ra, qizning ahvoli og‘ir: ko‘plab yorilishlar, yiringli asoratlar va abssesslar aniqlangan. 15 yoshida u atigi 28 kg vaznga ega. Qizaloqni to‘laqonli davolash uchun tor doiradagi mutaxassislar kerak, uni Toshkentdagi tibbiyot muassasasiga o‘tkazish masalasi muhokama qilinmoqda.
Jinoyat joyida ayblanuvchilar jabrlanuvchiga nima va qanday qilganliklarini ko‘rsatishdi, biroq qiz go‘yoki jinsiy aloqaga rozi bo‘lganini aytishdi. Qiz zo‘rlangandan so‘ng, agar u bu haqda kimgadir aytsa, “ko‘mib yuborish” bilan tahdid qilingan. Faolning so‘zlariga ko‘ra, tergov qilinayotganlarning advokatlari bor.
Yaqin ikki kun ichida davolash taktikasini belgilash uchun konsilium bo‘lib o‘tadi. Saodat Abduzakirovaning qo‘shimcha qilishicha, davolanish masalasi Sog‘liqni saqlash vazirining birinchi o‘rinbosari Elmira Bositxonova tomonidan nazoratga olingan.
Mudhish hodisa Bolalar ombudsmani va Ijtimoiy himoya milliy agentligi tomonidan nazoratga olindi. Voyaga yetmagan qizning zo‘rlanishi bo‘yicha jinoiy ish 9-may kuni qo‘zg‘atilgan. Tergov harakatlari Angren prokuraturasi tomonidan nazoratga olingan.
Bolalar ombudsmani o‘z vakolatlari doirasida jinoyatni tergov qilish va jabrlanuvchi qizning protsessual huquqlariga rioya etilishini monitoring qiladi.
O‘z navbatida, bolani himoya qilish va reabilitatsiya qilish choralarini “Inson” ijtimoiy xizmatlar hududiy markazi mutaxassislari ko‘rmoqda, deya ta’kidladi bolalar ombudsmani vakillari. Ularning so‘zlariga ko‘ra, qizga psixologik yordam, ijtimoiy maslahat va tibbiy ko‘rikdan o‘tish uchun yo‘llanma berilgan.
Hozirda bemor bronxopnevmoniya va kamqonlik tashxisi bilan shifoxonada davolanmoqda.
