Farg‘ona viloyatida shifokor adashib, bemorning sog‘ oyog‘ini kesib tashlagan. Oradan bir necha kun o‘tgach, u vafot etdi. Bu haqda Kun.uz sud qaroriga tayanib yozmoqda.
Mahkum Respublika ixtisoslashtirilgan endokrinologiya ilmiy-amaliy tibbiyot markazi Farg‘ona filiali xirurgiya bo‘limi mudiri lavozimida ishlagan.
Bemor 2024-yil 18-oktyabr kuni klinikaga olib kelinib, unga «qandli diabet II turi og‘ir shakli, dekompensatsiya bosqichi, DTS neyroishemik shakli, chap oyoq boldiri amputatsiyasidan keyingi holat, tizza bo‘g‘imining maydalangan sinishi» tashxisi qo‘yilgan.
O‘tgan yilning 9-sentyabridan 25-oktyabrigacha bo‘lim mudiri mehnat ta’tilida bo‘lgan, boshqa bir xodim bo‘lim mudiri vazifasini vaqtincha bajarib turgan.
Shunga qaramay, 18-oktyabr kuni mahkum o‘zboshimchalik bilan vaqtinchalik mudirni tajribasiz deb tanishtirib, davolanishdan chetlashtirgan. Keyin u bemorning chap oyog‘i sonini amputatsiya qilish rejasini ishlab chiqdi, ammo buning uchun hech qanday tibbiy ko‘rsatma yo‘q edi. Bu rejani u muvaqqat mudir nomidan tibbiy hujjatda rasmiylashtirdi.
Operatsiya ertasi kuni mudir tomonidan ixtiyoriy ravishda tanlangan tibbiyot xodimlari va maxsus malakaga ega bo‘lmagan talaba ishtirokida o‘tkazildi.
“Operatsiya vaqtida vrach kasal chap oyoq o‘rniga sog‘lom o‘ng oyoqni son sohasidan kesib tashladi. Keyinchalik chap oyog‘i ham amputatsiya qilindi – endi ko‘r, aniq tashxis qo‘yilmagan”, — deyiladi xabarda.
Ayol 7-noyabr kuni sog‘lom qo‘l-oyog‘ini yo‘qotgani va ikkita jarrohlik amaliyotining og‘irligi tufayli vafot etgan.
Jinoyat ishlari bo‘yicha Quva tuman sudi joriy yilning 6 may kuni bo‘lib o‘tgan sud majlisida erkakni Jinoyat kodeksining 116-moddasi 3-qismi (Kasb yuzasidan o‘z vazifalarini lozim darajada bajarmaslik) bilan aybdor deb topgan.
Unga 3 yil muddatga Sog‘liqni saqlash vazirligi tizimida rahbarlik va shifokorlik lavozimlarida ishlash huquqidan mahrum qilgan holda 4 yil muddatga ozodlikdan mahrum qilish jazosi tayinlandi. Jabrlanuvchining qonuniy vakili foydasiga 27,806 mln so‘m moddiy va 80 mln so‘m ma’naviy zarar undirilgan.
Shundan so‘ng shifokor apellyatsiya shikoyati berdi. Uning ta’kidlashicha, uning harakatlarida jinoyat tarkibi yo‘q va bemorning o‘limi uning harakatlari bilan bog‘liq emas. Jabrlanuvchining qonuniy vakili moddiy zarar miqdorini 28 mln 995 ming so‘mgacha, ma’naviy zararni 350 mln so‘mgacha oshirishni talab qilgan. Apellyatsiya instansiyasi dastlabki hukmni o‘zgarishsiz, ikkala shikoyatni ham qanoatlantirmasdan qoldirgan.
