“Потребитель.уз” hamjamiyati foydalanuvchilari bir kishi to‘lov qilmagani uchun butun qavatda sovuq suv o‘chirilganidan shikoyat qila boshladi. Holat yuzasidan “Toshkent shahar suv ta’minoti” matbuot kotibi izoh berdi.
Yuqoridagi holatlardan biri Chilonzor tumanida sodir bo‘lgan. Chilonzor 19-dahasidagi 10-uyda yashovchi fuqaroning aytishicha, uzoq vaqtdan beri kommunal to‘lovlarni to‘lamagan bir kishi tufayli sovuq suv tayanchi butun qavat bo‘ylab to‘sib qo‘yilgan.
“Toshkent shahar suv ta’minoti” matbuot kotibining ma’lum qilishicha, holatni o‘rganish davomida tuman inspektori qarzdorlikni undirish uchun bir necha marta uylardan biriga borgan, ammo natija bo‘lmagan. Qarzdorning o‘zidan suvni o‘chirishning iloji bo‘lmadi. Shu sababli inspektor o‘zboshimchalik bilan quvurni asosiy tarmoqdan uzib qo‘ygan. Oqibatda suvdan qarzi bo‘lmagan xonadonlar ham ma’lum muddat suvsiz qolib, haqli e’tirozlarga sabab bo‘ldi. Vaziyat qisqa muddatda bartaraf etildi.
Inspektorga bunday holat takrorlanmasligi haqida ogohlantirish berildi. Nima uchun suv ta’minoti korxonasi o‘z vazifasini bajarar ekan, pulini olish uchun iste’molchi bilan “mushuk-sichqon” o‘ynashi kerak? Bu ma’naviy va axloqiy emasmi?
“Biz yuzaga kelgan vaziyatni oqlamoqchi emasmiz. Biz faqatgina har kim o‘z vazifasini vijdonan va qonuniy bajarishi kerakligini eslatib qo‘ymoqchimiz”, — dedi kompaniya vakili.
Eslatib o‘tamiz, Toshkent hokimligi aholi xonadonlariga aqlli suv hisoblagichlari o‘rnatilishini ma’lum qilgandi. Dastlabki sinovlar poytaxtning Shayxontohur tumanida muvaffaqiyatli o‘tkazilgan. O‘rnatish bepul amalga oshiriladi.
