Toshkent shahrining ayrim bozorlarida arzon narxlarda go‘sht va go‘sht mahsulotlarini sotish shoxobchalari ochildi, deb xabar bermoqda poytaxt hokimligi matbuot xizmati.
Ma’lum qilinishicha, Toshkent shahrida aholini sifatli va arzon oziq-ovqat mahsulotlari bilan ta’minlash bo‘yicha tizimli ishlar amalga oshirilmoqda.
“Aviasozlar”, “Farhod”, “Eski Juva”, “Yunusobod” va “Qo‘yliq” oziq-ovqat bozorlarida 624 ta go‘sht mahsulotlari savdo rastalari faoliyat yuritgan. 3-avgust kuni qo‘shimcha ravishda yana 84 ta qator tashkil etildi. Savdo nuqtalarining umumiy soni 708 taga yetdi.
Ushbu savdo rastalarida go‘sht arzonlashtirilgan narxlarda sotilmoqda. Jumladan, 1 kg mahalliy mol go‘shti 85 ming so‘mdan, belarus mol go‘shti 70 ming so‘mdan, mahalliy qo‘y go‘shti 90 ming so‘mdan, muzlatilgan go‘sht 65 ming so‘mdan sotilmoqda.
Qayd etilishicha, 3-avgust holatiga ko‘ra, Toshkent shahri bozorlariga 78,9 tonna go‘sht yetkazib berilgan. Shundan 21,8 tonnasi yangi savdo nuqtalarida sotilmoqda:
- “Aviasozlar” — 3,1 tonna;
- “Farhod” — 5,6 tonna;
- “Eski Juva” — 6 tonna;
- “Yunusobod” — 3,2 tonna;
- “Qo‘yliq” — 4 tonna.
Yana bir savdo nuqtasi Mirzo Ulug‘bek tumanidagi “Navro‘z” bozorida ochildi. Bu yerda mahalliy, shuningdek, Belarus, Mo‘g‘uliston va Hindistondan keltirilgan turli navli mol va qo‘y go‘shtlari sotiladi.
Xususan, Belorussiyadan keltirilgan 1 kg mol go‘shtining narxi 70 ming so‘m, Mo‘g‘ulistonning 1 kg qo‘y go‘shti 75 ming so‘mni tashkil etadi.
