O‘zbekistonda yozning so‘nggi oyi boshlandi. O‘zgidromet sinoptiklari iyul oyida o‘zbekistonliklar qanday ob-havoni boshdan kechirganini ma’lum qildi.
Iyul oyi tugadi — iqlim xususiyatlariga ko‘ra yozning eng issiq oyi. Mana bu yil ham issiq keldi.
O‘rtacha oylik havo harorati iqlimiy me’yordan 1-3 darajaga yuqori bo‘ldi. O‘zbekiston hududining aksariyat qismida, shimoli-g‘arbiy tumanlardan tashqari, 2025-yil iyul oyi eng issiq iyul oylari uchligiga kirdi, bir qator tumanlarda esa barcha kuzatuv yillaridagi eng issiq bo‘ldi.
O‘rtacha sutkalik havo haroratining me’yordan chetga chiqishi. Deyarli butun oy davomida havo harorati hamma joyda iqlimiy me’yordan yuqori bo‘ldi. Havo kunduz kunlari 38-41 darajagacha, eng issiq kunlarda 42-44 darajagacha, janubda va cho‘l hududlarda 45-48 darajagacha isidi.
Respublikaning ayrim hududlarida 2025 yil iyul oyidagi maksimal havo harorati barcha meteorologik kuzatuv yillari uchun rekord bo‘ldi yoki oldingi yillarda o‘rnatilgan rekordni takrorladi.
Ikkinchi o‘n kunlikning boshida va oyning oxirida qisqa muddatli davrlar harorat sharoitlari bo‘yicha eng qulay bo‘ldi. Havo harorati kunduz kunlari 32-36 darajadan oshmadi. Respublika hududining katta qismida 2025-yil iyul oyida 40 daraja va undan yuqori haroratli kunlar soni ko‘p yillik o‘rtacha ko‘rsatkichdan sezilarli darajada ko‘p bo‘ldi.
Bunday yuqori haroratli kunlarning eng ko‘pi respublika janubining ayrim hududlarida kuzatildi — 18 kundan 24 kungacha.
Toshkentda 2025-yil iyul oyi havo harorati 40 daraja va undan yuqori bo‘lgan kunlar soni bo‘yicha (11 kun) 2018 va 2022-yil iyul oylari bilan ikkinchi o‘rinni egallaydi. Ushbu reytingda birinchi o‘rinni 2019 yilning iyul oyi egalladi — 14 kun ketma-ket Toshkentda havo harorati 40 darajadan 42,5 darajagacha bo‘lgan ekstremal yuqori qiymatlarga yetdi.
Ayrim hududlarda 2025-yil iyul oyida havo harorati 40 daraja va undan yuqori bo‘lgan kunlar soni meteorologik kuzatuvlarning barcha yillari uchun maksimal bo‘lgan (masalan, Navoiyda 17 kun, Farg‘onada 7 kun).
Iyul oyi quruq keldi. O‘zbekiston hududining katta qismida o‘tgan iyul oyida umuman yomg‘ir yog‘madi. Faqat Farg‘ona vodiysi viloyatlarida va Toshkent viloyatining tog‘li hududlarida 1-2 martadan qisqa muddatli yomg‘ir yog‘ishi kuzatildi. Bir kecha-kunduzda yog‘ingarchilik miqdori 8-13 mm ga yetgan.
O‘zbekiston hududi uchun quruq iyul odatiy hol. Shunga qaramay, bu yil ketma-ket to‘rtinchi oy (2025-yil aprel oyidan boshlab) yog‘ingarchilik taqchilligi kuzatildi.
