O‘zbekistonda sifatsiz va xavfli tovarlarni aniqlashga yordam bergan fuqarolar uchun mukofotlash tizimi joriy etiladi. Bu haqda Normativ-huquqiy hujjatlar loyihalari muhokamasi portalida ma’lum qilindi.
“Bozor nazorati to‘g‘risida”gi qonun loyihasi 21-avgust kuni jamoatchilik muhokamasiga qo‘yildi. Vazirlar Mahkamasiga to‘rt oy muddatda qonunbuzilish holatlari haqida xabar bergan fuqarolarni moddiy rag‘batlantirish tartibini tasdiqlash topshirildi. Hujjatda, shuningdek, sifatsiz mahsulotlardan zarar ko‘rganlarga kompensatsiya to‘lash ko‘zda tutilgan.
Vafot etgan taqdirda moddiy zararning to‘liq summasidan kam bo‘lmagan miqdorda, nogiron bo‘lib qolgan taqdirda — ushbu summaning kamida yarmini, sog‘liqqa boshqacha tarzda zarar yetkazilgan taqdirda — beshdan bir qismidan kam bo‘lmagan miqdorda to‘lanadi.
Tovarlarning xavfsizligini nazorat qilish nazorat xaridlari, ekspertizalar, shikoyatlarni tahlil qilish va mahsulotlarning standartlarga muvofiqligini tekshirish orqali amalga oshiriladi.
Qoidabuzarliklar aniqlangan taqdirda tovarlar 15 ish kunidan kechiktirmay bozordan olib qo‘yilishi kerak. Loyihaning jamoatchilik muhokamasi 5 sentyabrgacha davom etadi. Qonun 2026-yil 1-iyuldan kuchga kirishi mumkin.
