O‘zbekistonda mahallalarda yoshlar bilan ishlash tizimi samaradorligi oshiriladi. Bu haqda prezidentning tegishli farmonida so‘z boradi.
Hujjatga muvofiq, mahallalarda yoshlar bilan ishlash tizimini takomillashtirishning asosiy maqsadlari etib quyidagilar belgilandi:
- yoshlar bilan yakka tartibda va manzilli ishlashni faollashtirish orqali yoshlar yetakchilari faoliyati samaradorligini oshirish;
- yoshlarning kasbiy qiziqishlarini erta aniqlash orqali mehnat bozoriga raqobatbardosh kadrlar kirib kelishini ta’minlash.
Quyidagilar mahallalardagi yoshlar yetakchilarining asosiy vazifalari etib belgilandi:
- o‘ziga bo‘lgan ishonchni oshirish, mahalla darajasida ijtimoiy ahamiyatga ega loyihalarni amalga oshirish;
- yoshlarning iste’dodini ro‘yobga chiqarishga qaratilgan tadbirlarni tashkil etish, yoshlar o‘rtasida “Besh tashabbus olimpiadasi”ni keng targ‘ib qilish;
- tadbirkorlik ko‘nikmalarini mustahkamlash orqali mehnat bozoriga kirib kelayotgan yoshlarning bandligiga ko‘maklashish;
- “Yoshlar daftari”ga kiritilgan yoshlarga ijtimoiy sheriklik tamoyili asosida yordam ko‘rsatilishini ta’minlash.
Farmonda yoshlar yetakchilari zimmasiga ko‘rsatilgan asosiy vazifalar bilan bog‘liq bo‘lmagan boshqa vazifa va topshiriqlarni yuklash taqiqlanadi.
