Shavkat Mirziyoyev 17-sentyabr kuni Namanganda bo‘lib o‘tayotgan “Kambag‘allikdan farovonlik sari” xalqaro forumida tabrik nutqi so‘zladi. Bu haqda prezident matbuot kotibi xabar bermoqda.
Mamlakat yetakchisi geosiyosiy, iqtisodiy va ijtimoiy beqarorlik kuchayib borayotganini qayd etdi. Global yalpi ichki mahsulotning o‘rtacha yillik o‘sishi 2015-yildan beri 3 foizgacha sekinlashdi, qashshoqlik chegarasidan pastda yashovchi aholi soni esa besh yil ichida to‘rtdan bir qismga — 650 milliondan 800 milliongacha o‘sdi.
O‘zbekiston fuqarolarni barqaror ish bilan ta’minlash, ularning daromadlarini oshirish va turmush darajasini yaxshilash choralarini ko‘rmoqda. Ular Jahon banki va BMT ko‘magida tasdiqlangan kambag‘allikning milliy mezonlari asosida ishlab chiqiladi. Ular allaqachon 7,5 million kishini muhtojlar toifasidan chiqarishga imkon berdi. Kambag‘allik darajasi 2024-yil yakuni bo‘yicha 8,9 foizgacha pasaydi, joriy yil oxiriga kelib esa 6 foizgacha pasayishi kutilmoqda.
COVID-19 pandemiyasi davrida 800 mingga yaqin oila dori-darmon, 255 ming oila oziq-ovqat, 1,2 million oila ijtimoiy nafaqa bilan bepul ta’minlandi. Ushbu chora-tadbirlar tufayli 5,2 million fuqaro “kambag‘allik qopqoni”dan qutuldi.
Davlatimiz rahbari “mahallabay” ishlash, har bir oilaning daromadini oshirish bo‘yicha individual rejalar tuzish tajribasini ishga soldi. Mahallalarni obodonlashtirish, biznes va fuqarolar hayoti uchun infratuzilmani yaxshilash uchun har yili 2,5−3 mlrd dollar ajratiladi.
Ilgari paxta va g‘alla ekib kelingan 235 ming gektar yer qishloq aholisiga berildi. 800 mingga yaqin fuqaro ishlov berish uchun 30−50 sotixdan yer uchastkalarini olish imkoniyatiga ega bo‘ldi, bu ularga qo‘shimcha daromad olishga yordam berdi.
Bir so‘z bilan aytganda, har bir mahallaga biznes muhiti, har bir oilaga farovonlik kirib borganini odamlar o‘z hayotida his etmoqda. Bunday keng ko‘lamli sa’y-harakatlarimiz hisobiga O‘zbekiston 2030 yilga qadar kambag‘allikni 2 karra qisqartirish bo‘yicha olgan majburiyatini barvaqt bajarishga harakat qilyapti, — dedi Shavkat Mirziyoyev.
