“Adolat” partiyasi siyosiy kengashi rahbari Robaxon Mahmudova yo‘llarda yo‘l harakati qoidalarini buzganlik uchun jazoni kuchaytirish taklifi bilan chiqdi.
2024-yilda mamlakat bo‘ylab 9364 ta yo‘l-transport hodisasi qayd etilgan bo‘lib, ularda 2,2 ming kishi halok bo‘lgan va yana 9 ming kishi jarohatlangan. Har to‘rtinchi avariya o‘lim bilan tugaydi va kuniga o‘rtacha 6 kishi yo‘llarda halok bo‘ladi. Yo‘llardagi vaziyatni yaxshilash uchun “Adolat” yo‘l harakati qoidalarini ashaddiy buzuvchilarning “iqtisodiy javobgarligini kuchaytirishga” chaqiradi.
Ular uchun OSAGO bo‘yicha sug‘urta mukofotlarini keskin oshirish taklif etilmoqda. Shuningdek, partiya tezlikni sezilarli darajada oshirganlik uchun jarimalarga qo‘shimcha ravishda 3 yildan 10 yilgacha haydovchilik guvohnomasidan mahrum qilishni tavsiya etadi. Maktab va bog‘chalar yaqinida tezlikni oshirish holatlari uchun alohida qat’iy sanksiyalar nazarda tutiladi.
Bundan tashqari, o‘lim bilan tugagan yo‘l-transport hodisalari uchun, xususan, bolalar orasida qurbonlar bo‘lsa, jazolarni ikki baravar kuchaytirish taklif qilinmoqda. Hozir bitta halokat uchun 8 yilgacha, ikki va undan ortiq halokat uchun 10 yilgacha ozodlikdan mahrum qilish jazosi ko‘zda tutilgan. Agar haydovchi mast holda o‘lim bilan tugagan YTH sodir etgan bo‘lsa, “Adolat” uni umrbod haydovchilik guvohnomasidan mahrum qilishga chaqiradi.
Yo‘llarda o‘lim holatlarining oldini olish uchun partiya O‘zbekistonda Vision Zero xalqaro dasturini joriy etishni tavsiya qiladi. Yo‘l harakatini qayta tashkil etish loyihasida hozir Shvetsiya, Norvegiya, Germaniya, Niderlandiya, Buyuk Britaniya, Kanada va boshqa davlatlar ishtirok etmoqda.
