Rossiyalik teleboshlovchi Vladimir Solovyov “ta’sir zonasi” haqida keskin bayonot berib, Armaniston va Markaziy Osiyoni tilga oldi.
To‘g‘ridan-to‘g‘ri efirda Vladimir Solovyov AQShning Venesuela va Grenlandiyaga nisbatan harakatlariga izoh berdi.
Dunyo o‘zini aniq belgilab oldi. Shunday Amerika borki, u shunday deydi: Bu meniki va men barcha qonunlarga tupuraman. Yevropacha ertaklaringga tupurdim, menga Grenlandiya kerak — olib qo‘yaman. Barcha kelishuvlaringizga tupurdim, menga Venesuela kerak — men olib qo‘yaman, — dedi u.
Shundan so‘ng u Rossiyaning harakatlarini parallellashtirib, “ta’sir zonasi”ni muhokama qilishga o‘tdi.
Biz hozir Suriya yoki Venesuela bilan shug‘ullanmasligimiz kerak. Biz o‘z pozitsiyalarimizni yo‘qotmasligimiz kerak. Lekin biz uchun eng muhimi — yaqin xorijimiz. Biz uchun Armanistondagi voqealar Venesueladagi voqealardan ko‘ra ancha og‘riqli. Armanistonni yo‘qotish — bu juda katta muammo. Muammo bizning Osiyoda — O‘rta Osiyoda, Markaziy Osiyoda, uni shunday atashadi, mana bu biz uchun ulkan muammo bo‘lishi mumkin.
Va biz o‘z maqsad va vazifalarimizni juda aniq ifodalashimiz kerak. O‘yinlar tugadi, deb tushuntirishimiz kerak. Xalqaro huquqqa, xalqaro tartibga tupurdim. Agar milliy xavfsizligimiz uchun Ukraina hududida maxsus harbiy operatsiyani boshlashimiz kerak bo‘lgan bo‘lsa, nega aynan shu mulohazalarga asoslanib, ta’sir doirasimizning boshqa nuqtalarida ham maxsus harbiy operatsiyani boshlay olmaymiz? Balki milliy doktrinamizni shakllantirib, ta’sir doiramiz qayerda ekanini aniq aytishimiz kerakdir. Hammasi tushunarli bo‘ladi, — dedi u.
