Ballondagi gaz 15-noyabrdan kilogrammiga 5 000 soʻm boʻladi, ehtiyojmand oilalarga 3 000 soʻmdan qaytariladi

Vazirlar Mahkamasi 31-oktabr kuni aholini suyultirilgan gaz bilan taʼminlashda bozor mexanizmlariga bosqichma-bosqich oʻtish toʻgʻrisida 602-son qaror qabul qildi.

15-noyabrdan aholi uchun suyultirilgan gazning chakana narxi QQS bilan birga kilogrammiga 5 000 soʻmni tashkil etadi. Yetkazib berish bilan «Hududgaztaʼminot» AJ tomonidan taʼsis etilgan yangi ixtisoslashgan LPG-Trade kompaniyasi shugʻullanadi. Uning xizmatlari narxi kilogrammiga 1 300 soʻmdan oshmaydi.

Gazning bozor qiymati va aholi uchun belgilangan narx oʻrtasidagi farq operatorga davlat byudjetidan subsidiya hisobiga qoplanadi. 2027-yil 1-maygacha hukumat bozorni tahlil qilib, narxlarni yanada erkinlashtirish boʻyicha takliflar tayyorlaydi.

Kam taʼminlangan oilalar uchun 2030-yil 1-yanvargacha kompensatsiya joriy etiladi — sotib olingan har bir kilogramm uchun 3 000 soʻm, biroq oila boshiga oyiga 20 kilogrammdan oshmagan miqdorda. Pul xarid tasdiqlangandan soʻng ijtimoiy kartaga tushadi. Toʻlovni olish huquqiga quyidagilar ega:

• Ijtimoiy reestrga kiritilgan oilalar;
• reestrga kirmagan, ammo jon boshiga oʻrtacha daromadi eng kam isteʼmol xarajatlarining ikki baravaridan (1,43 mln soʻm) oshmaydigan oilalar;
• yetim bolalar va ota-ona qaramogʻidan mahrum boʻlgan bolalarni tarbiyalayotgan oilalar.

Agar yagona kadastr raqamiga ega bitta uy yoki kvartirada alohida plitali bir nechta oila yashasa, ularning har biriga alohida gaz ballon olishga ruxsat beriladi. Buning uchun mahalla va gaz xizmati joyida koʻrik dalolatnomasini tuzadi.

Raqobatni rivojlantirish qoʻmitasiga narxlarning sunʼiy oshirilishiga yoʻl qoʻymaslik uchun birja savdolarini kuzatib borish topshirildi.

Eslatib oʻtamiz, bahorda mamlakatda kompaniyalar til biriktirgani sababli propan narxi oshgan edi.