Sloveniyada dunyodagi eng katta odam katapultasi ochildi

Sloveniyada dunyodagi eng katta odam katapultasi qurildi, uning yordamida ikki Red Bull beysjamperi 2,15 soniyada soatiga 180 km tezlikka erishdi.

Uchirish 5-noyabr kuni Yevropadagi eng baland moʻri – Trbovlyedagi 360 metrlik moʻrida boʻlib oʻtdi. Loyiha yakunida sportchilar Ginnesning rekordlar kitobiga ikkita rekord kiritdi.

Loyiha ishtirokchilari fransiyalik Fred Fyujen va ispaniyalik Dani Roman boʻldi. Ularni uchirish uchun moʻrining tepasiga sloveniyalik kaskadyor va muhandislar jamoasi DD Squad ishlab chiqqan maxsus 60 metrlik katapulta oʻrnatildi.

Sportchilar atigi 2,15 soniyada noldan soatiga 180 km tezlikka erishdi, shundan soʻng start kapsulasidan chiqib, vertikal yuqoriga harakatni davom ettirdi. Eng yuqori nuqtaga yetib, qisqa muddatli vaznsizlik holatini his qilgach, ular erkin tushishga oʻtdi, soʻng parashyutlarni ochib, eson-omon qoʻndi.

Natijada Dani Roman katapulta yordamida inson erishgan eng katta balandlik boʻyicha rekord oʻrnatdi – 100,36 metr. Birgalikdagi uchirish chogʻida sportchilar eng katta umumiy balandlik boʻyicha ham rekord oʻrnatdi: 151,72 metr. Roman 75,97 metrga, Fyujen esa 75,75 metrga koʻtarildi.

Katapulta aynan shu loyiha uchun ishlab chiqilgan. Konstruksiya asosida 4,2 G gacha tezlanishni taʼminlay oladigan ikki tonnalik koʻp prujinali tizim yotadi. Uni bevosita Trbovlye moʻrisi ichida qurish taxminan ikki oy davom etgan.

Uchirishga tayyorgarlik ikki yarim yil davom etdi. Dastlabki sinovlar suv ustidagi kichik katapultada oʻtkazildi, soʻngra jamoa Ultimate Aerial Obstacle Course loyihasi doirasida olti metrlik konstruksiyalardan foydalandi. Keyinroq Italiyadagi Sass-Pordoy togʻ dovonida sinovdan oʻtkazilgan 12 metrlik versiya yaratildi. Bu bosqichlar sportchilarni yakuniy uchirishdagi yuklamalarga tayyorlash imkonini berdi.

DD Squad bosh direktori Gashper Novakning soʻzlariga koʻra, konstruksiyani ishlab chiqishda asosiy vazifa shunchaki maksimal quvvatga erishish emas, balki boshqariladigan uchirish va sportchilar xavfsizligini taʼminlash edi.

Dani Romanning aytishicha, start paytida sportchilar avval kuchli tezlanishni his qiladi, soʻng yuqoriga koʻtarilishda davom etadi. Eng yuqori nuqtada harakat bir lahzaga sekinlashgandek boʻladi, keyin esa tushish boshlanadi.

Fred Fyujen esa bunday miqyosdagi katapultadan uchirilish ishtirokchilar uchun mutlaqo yangi tajriba boʻlganini, unga bardosh berishda toʻplangan koʻnikmalar va ishlab chiquvchilar jamoasiga ishonch yordam berganini taʼkidladi.