Тошкентда Кинематография агентлиги ва пойтахт кинотеатрлари раҳбарлари иштирокида йиғилиш бўлиб ўтди. Учрашувда кинотеатрларда хорижий фильмларни давлат тилида намойиш этишдаги муаммолар муҳокама қилинди. Бу ҳақда Кинематография агентлиги матбуот хизмати хабар берди.
Қайд этилишича, Ўзбекистон президентининг 2018 йил 24 июлдаги қарори асосида 2019 йил 1 январдан бошлаб ҳажмлар квотаси тизими жорий этилган эди.
Қарорга асосан мулкчилик шаклидан қатъий назар, мамлакатимиз кинотеатрларида кунига камида иккита тўлиқ метражли, ойлик экран ҳажмининг камида 25 фоизи миқдорида миллий бадиий фильмларни намойиш этилиши керак. Байрамлар кунлари эса – 40 фоиз миқдорида.
Кинотеатрлар директорлари ва агентлик ходимлари кинопрокатнинг мавжуд муаммоларини ҳал этиш ва хорижий фильмларни ўзбек тилига дубляж қилиш бўйича ишчи гуруҳ тузишга қарор қилинди.
