Туркиянинг «Антальяспор» футбол клубининг исроиллик ярим ҳимоячиси Сагив Йехезкель «оммавий адоват ва нафрат уйғотиш»да айбланиб ҳибсга олинди. Бу ҳақда Туркия адлия вазири Йилмаз Тунч маълум қилди. Унга кўра, 28 ёшли футболчи «Исроил томонидан Ғазо секторида амалга оширилган қирғинни қўллаб-қувватлашдаги масъулиятсиз ҳаракатлари туфайли» қўлга олинган.
14 январь куни Сагив Йехезкель «Антальяспор» — «Трабзонспор» учрашувида гол урди, шундан сўнг қўлидаги «100 кун. 7.10» ва Довуд юлдузини кўрсатди (14 январь куни ҲАМАСнинг 2023 йил 7 октябрда Исроилга ҳужум қилганига 100 кун тўлди).
Исроилнинг «Едиот Ахронот» газетасига кўра, Йехезкель аксинча урушга қарши бўлганини билдириш учун ушбу ёзувни кўрсатган.
Ўйиндан сўнг «Антальяспор» клуби раҳбарияти Йехезкелни жамоадан четлатганини маълум қилди ва у билан шартномани бекор қилишга қарор қилди. Hurriyet нашрининг ёзишича, клуб спортчини Туркиянинг «миллий қадриятларига қарши гапирганликда» айблаган.
Исроилнинг собиқ бош вазири Нафтали Беннет Туркиянинг ҳаракатларини очиқчасига қоралади: «Бу 2024 йилги Туркия. Уят, Туркия ҳукумати».
Исроил ҳукумати Йехезкелнинг озод этилишини таъминлаш чораларини кўрмоқда, дея хабар беради The Times of Israel батафсил маълумот бермасдан.
