Технологиянинг ривожланиши билан, айниқса, кенгайтирилган ҳақиқат, ақлли уйлар ва робот жарроҳлар пайдо бўлиши билан тез маълумотларни узатишга бўлган эҳтиёж ортиб бормоқда. 6G мобил алоқа авлоди юқори тезликда маълумотларни узатишни таъминлаш учун субтерагерц частоталари ва кўп даражали сигнал модуляцияси технологиясидан фойдаланишга тайёр.
Бироқ муаммо фазавий шовқинни камайтиришда бўлиб қолмоқда, бу жуда юқори тезликда кўп даражали сигнал модуляциясининг ишлашига таъсир қилиши мумкин.
Айнан шу муаммони Осака университети жамоаси ВРМБ лазерининг кучидан фойдаланиб, ёруғликни кучайтириш ва аниқ сигнал яратиш учун товуш тўлқинларидан фойдаланган ҳолда ҳал қилишни мақсад қилган. Ушбу инновацион ёндашув фаза шовқинини сезиларли даражада камайтирди, 300 гигагертсли частотада алоқага тўсқинлик қилган чекловларни бартараф этди.
Олимлар сигнални демодуляция қилиш ва маълумотлар узатиш тезлигини ошириш учун қабул қилувчи ва узатувчида рақамли сигнални қайта ишлаш (DSP)ни ўз ичига олган сигнал генератори билан 300 ГГц ли алоқа тизимини яратди.
Ушбу ишнинг ажойиб натижаси бутун дунё бўйлаб DSPʼга асосланган тизимларни ривожлантиришда муҳим босқич бўлган ягона каналда 240 Гбит/с маълумотларни узатишнинг рекорд тезлиги бўлди. Каналларни мультиплекслаш усулларини янада такомиллаштириш ва сезгир қабул қилувчиларни ишлаб чиқиш билан тадқиқотчилар келажакда таъсирчан 1 Тбит/с га эришишни мақсад қилиб, маълумотлар тезлигини янада оширишни режалаштиришмоқда.
Мобил алоқанинг олтинчи авлоди ўзидан олдинги 5Gʼга нисбатан маълумотлар узатиш тезлигини 50 баравар оширишни, шунингдек, сигналнинг кечикишини сезиларли даражада 10 баробарга қисқартиришни ваъда қилмоқда. Япон олимларининг яқинда эришган ютуғи турли технология соҳаларига таъсир кўрсатадиган юқори тезликдаги симсиз алоқа келажаги учун кучли пойдевор яратади.
