Норин ГЭСлар каскади 6 та ГЭСдан иборат бўлиб, ҳар бир ГЭСнинг қуввати 38 МВтни (9,5 МВт қувватли 4 тадан гидроагрегат ўрнатилади) ташкил қилади. Ушбу истиқболли лойиҳанинг ишга туширилиши натижасида йилига ўртача 1 025 млн кВт/соат экологик тоза электр энергияси ишлаб чиқарилади.
Қурилиш давридаги ишчилар сони: 300 нафар.
Лойиҳа тўлиқ «Ўзбекгидроэнерго» АЖ маблағларидан молиялаштирилади.
Қурилиш жараёни: режага мувофиқ ГЭС-1 ва каскад подстанцияси қурилиши 2024-2025 йиллар, ГЭС-2 қурилиши 2025-2026 йиллар, ГЭС-3 ва ГЭС-4 қурилиши 2026-2027 йиллар, ГЭС-5 ва ГЭС-6 қурилиши 2027-2028 йилларда амалга оширилади.
Лойиҳанинг самарадорлиги:
- йилига ўртача қарийб 430 минг та хонадон электр энергияси билан таъминланади;
- йилига ўртача 277 млн м3 газ иқтисод қилинади;
- яратиладиган доимий иш ўрни – 133 та.
25 март куни президент Шавкат Мирзиёев томонидан Наманган вилоятининг Уйчи туманида қуввати 228 МВт бўлган Норин ГЭСлар каскади қурилиши лойиҳасининг бошланишига старт берилди.
Мазкур барпо этиладиган ГЭСлар каскади республикада биринчи бор тўлиғича «Миллий ГЭС»га айланади. Сабаби лойиҳа тўлиқ Жамият маблағлари ҳисобидан, маҳаллий лойиҳалаштириш ва пудрат ташкилотларини жалб қилган ҳолда амалга оширилади. Лойиҳа учун зарур бўлган асбоб-ускуналар ҳам тўлиқ маҳаллийлаштириш асосида ишлаб чиқарилади.
Лойиҳа ижроси доирасида Жамият томонидан аввалдан тайёргарлик ишлари амалга оширилган бўлиб, барча зарурий ташкилий-амалий жараёнлар учун муҳим бўлган база яратилган. Хусусан, инновацион лойиҳалар, маҳаллийлаштириш дастури доирасида Zhejiang Jinlun Electromechanic Co., Ltd. компанияси билан изчил ҳамкорликда мамлакатимизда Марказий Осиё мамлакатларида илк бор гидроагрегатларни ишлаб чиқариш фаолияти йўлга қўйилмоқда. Эндиликда қуввати 40 МВтгача бўлган гидроагрегатлар «Made in Uzbekistan» миллий бренди асосида маҳаллийлаштириш доирасида Ўзбекистонда ишлаб чиқарилади. Мазкур гидроагрегатлар «Ўзбекгидроэнерго» АЖнинг тизим ташкилоти ҳисобланган, Тошкент вилояти Бўстонлиқ туманида жойлашган UGE-JINLUN қўшма корхонасида ишлаб чиқарилади.
Юқори инновацион технологик қурилмаларнинг мамлакат гидроэнергетика соҳасида илк бор ишлаб чиқарилиши йўлга қўйилмоқда ҳамда маҳаллийлаштириш доирасида келгуси истиқболда молиявий сарф-харажатларни иқтисод қилишга, сифатли ва замонавий стандартларга асосланган агрегатларни ишлаб чиқарилишини ўзлаштиришга хизмат қилиши шубҳасиз.
Пировард натижада, мамлакатимиз гидроэнергетик салоҳияти янада ортади ҳамда янги истиқболли лойиҳаларни амалга ошириш орқали тоза ва арзон электр энергия манбаини ишлаб чиқариш ҳажми кескин оширилади.
