The Bell нашрига кўра, россиялик IT-тадбиркор, CarPrice ва CarMoney компаниялари асосчиси Эдуард Гуринович машҳур Hamster Kombat ўйини яратувчилардан бири ҳисобланади.
Бу «Жаба и гадюка» Telegram канали ўйин бошланишидан икки ой олдин қўшимча hamsterkombat.com домени рўйхатдан ўтказилгани ҳақида хабар берганидан кейин маълум бўлди. Рўйхатдан ўтишда электрон почта манзили ап@arenum.games бўлиб, у Кипрнинг Arenum ltd. компаниясига тегишли. Ушбу компаниянинг акциядорлари орасида Эдуард Гуринович, Александр Зеленшчиков ва Александр Пасечник бор.
The Bell суҳбатдошларидан бири Hamster Kombatʼнинг бенефициарлари орасида ўйин бошланган Telegram мессенжери ҳам борлигини таъкидламоқда. Манбага кўра, Telegramʼдаги клик ўйинларида Яндекс ва ВКонтактеʼни жамлагандан кўра кўпроқ трафик бор ва у яхши сотилади.
Эндиликда Hamster Kombatʼнинг «айланмаси» кунига бир неча миллион долларга етмоқда ва пул реклама берувчилардан, асосан, ўйинчиларнинг аниқ ҳаракатлари учун тўлайдиган криптобиржаларидан келади: веб-сайтларга кириш, видео томоша қилиш ва ҳамёнларни ўрнатиш.
Телеграм учун бундай ўйинлар нафақат янги криптовалюталарда пул ишлаш, балки TON блокчейнини тарғиб қилиш, шунингдек, платформани Apple ва Google дўконларига қараганда ишлаш осонроқ бўлган иловалар дўкони сифатида реклама қилиш имкониятидир.
Hamster Kombat — бу кликер ўйин бўлиб, унда ўйинчига криптобиржаси эгаси бўлиш ва уни ривожлантириш билан шуғулланиш таклиф этилади. Бу криптовалюта лойиҳаси бўлиб, унда фойдаланувчилар биржада рўйхатга олиниши ва реал пулга айлантирилишини кутган ҳолда виртуал тангалар ишлаб топмоқда. Ўйин яратувчилари Hamster Kombatʼда 150 миллиондан ортиқ ўйинчи борлигини таъкидлаган.
