Financial Times нашрининг ёзишича, Германия разведка хизматлари мамлакатда бўлиб ўтаётган футбол бўйича Европа чемпионати воқеаларини ИШИД террорчиларининг Москвадаги «Крокус Сити Холл»га уюштирилган ҳужумга ўхшаш ҳужуми учун эҳтимолий нишон сифатида кўрмоқда.
Германия Конституциясини ҳимоя қилиш федерал идораси раҳбари Томас Халденванг 2023 йил 7-октабрда Хамаснинг Исроилга ҳужумидан сўнг мамлакатда исломий терроризм хавфи кучайганини таъкидлади.
Унинг фикрича, яқинда Москвада бўлгани каби кенг кўламли мувофиқлаштирилган терактлар содир этилиши мумкин.
Хальденвангнинг сўзларига кўра, ИШИД-К гуруҳи (Крокусга қилинган ҳужум учун жавобгарликни ўз зиммасига олган Вилоят Хуросон ячейкаси) Украинадан келган қочқинлар ниқоби остида ўз тарафдорларини Ғарбий Европага олиб ўта олган. У шунингдек, гуруҳ тарафдорларини Европадаги «юмшоқ нишон»ларга ҳужум қилишга чақирувчи кўплаб ташвиқот видеоларини чоп этганини айтди.
Financial Times газетаси иқтибос келтирган Германия ички ишлар вазири Нэнси Фезернинг айтишича, Европа ва у билан бирга Германия жиҳодчи ташкилотлар, хусусан, ИШИД ва ИШИД-К нинг кесишган нуқтасида бўлиб турибди.
Фезер, шунингдек, мамлакатда антисемитизм жиноятлари кескин ошгани ва яҳудий рамзларини таққанлар, масалан, «Маккаби Германия» спорт клуби аъзолари кўпинча ҳақорат ва ҳужумларсиз ташқарига чиқа олмаслигини таъкидлайди.
