Ўзбекистон Бош прокуратураси Чилонзор туман прокуратурасининг телебошловчи Рамина Ягафарованинг ўлими юзасидан жиноий иш қўзғатилмагани ҳақидаги қарорини текширишга киришди.
Эслатиб ўтамиз, 2023 йил 13 сентябрь куни Дунё бўйлаб телеканалининг «Ўз кўзим билан» кўрсатуви бошловчиси Рамина Ягафарова 31 ёшида вафот этган эди.
Ўшанда Бош прокуратура ўлимга дори [левофлоксатсин]га аллергик реакция, мия ва ўпканинг ўткир шиши, ўткир респиратор ва юрак-қон томир етишмовчилиги ҳамда анафилактик шок сабаб бўлганини маълум қилган. Идоранинг аниқлик киритишича, бу ОАВ учун дастлабки маълумотларга асосланган тезкор маълумот бўлган.
29 июнь куни «Газета.uz» суд-тиббий экспертиза комиссияси хулосасига таяниб, Рамина Ягафарованинг ўлимига тиббий хатолар сабаб бўлиши мумкинлиги ҳақида хабар берди. Хусусан, ўлимнинг асосий сабаби қусиш билан нафас йўлларининг тиқилиб қолиши бўлиб, берилган дори воситаларининг ножўя таъсирлари ўлим бошланишини тезлаштирган омилларга айланди, дейди мутахассислар.
Марҳумнинг синглиси Диана Иртуганова ва адвокат Шуҳрат Қаюмов берган маълумотларга кўра, Чилонзор туман прокуратураси жиноят ишини қўзғатишдан бош тортган. Қарор 15 октябрда ёки 13 сентябрда бошланиб, 1 ноябрда якунланган дастлабки суд-тиббиёт экспертизаси якунланишига икки ҳафта қолганда қабул қилинган.
«Чилонзор тумани прокуратураси томонидан ўтказилган терговга қадар текшириш натижасига кўра, марҳума Р.Ягафарованинг вафот этганлиги ҳолатида жиноий ҳодиса юз бермаганлиги сабабли, жиноят иши қўзғатишни рад қилиш ҳақида қарор қабул қилинган. Ҳозирда Диана Иртуганованинг мурожаатларида келтирилган важлар асосида Чилонзор тумани прокуратураси томонидан қабул қилинган жиноят иши қўзғатишни рад қилиш ҳақидаги қарори назорат тартибида ўрганилмоқда.», — дейилади Бош прокуратура хабарида.
