4 июль куни тиббиёт ва фармацевтика соҳасидаги бизнесга бағишланган очиқ мулоқот чоғида Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директори Абдулла Азизов тиббиёт ва фармацевтика маҳсулотларига нисбатан нарх чекловлари бекор қилинишини маълум қилди.
Тадбиркорлардан бирининг айтишича, белгиланган тариф лимити туфайли дори-дармон ва тиббий техника контрабандаси «гуллаб-яшнамоқда», ҚҚС бўйича имтиёзлар бекор қилингандан сўнг бозорда контрабанда маҳсулотлари янада кўпайиб кетиши мумкин. Шунингдек, у дори воситалари миллионлаб тиражда, тиббий асбоб-ускуналар эса узоғи билан 1000 дона сотилаётганига эътибор қаратди.
Маълумки, 2017 йилдан бошлаб дистрибюторлар учун максимал устама базавий нархнинг 15 фоизини, дорихоналар учун - харид нархининг 20 фоизини ташкил қилади. 2020 йилда дори-дармон нархлари эталон нархлар тизимининг бир қисми сифатида қайд этила бошланди. Бу тартибга солувчи орган томонидан ишлаб чиқарилган ва бошқа бир қанча мамлакатларда ишлаб чиқарувчи маҳсулот нархларини таққослашдир. Давлат регулятори хорижда маълум бир маҳсулот учун нарх даражасини таққослаб, сотувчиларга ундан ошиб кетишини тақиқлаб, бозор нархининг чегарасини танлаш ҳуқуқига эга.
Фармацевтика агентлиги раҳбари Абдулла Азизовнинг айтишича, бу таклиф аллақачон Президент қарори лойиҳасига киритилган ва Президент Администрациясида кўриб чиқилмоқда.
«Биз бу ҳақда Молия вазирлиги билан келишиб олдик. 15-20% устама фақат рецепт бўйича бўлган дорилар учун қолади. Бу чегара ҳам рецептсиз, ҳам тиббий маҳсулотлар учун олиб ташланади. Ҳамма рухсат берди. 1-2 банд бўйича келишиш қолади, менинг тахминларимга кўра, фармон 2-3 ҳафта ичида чиқарилиши керак», — деди у.
Тадбиркор бозорда ҳамма учун тенг шароит яратиш мақсадида солиққа оид ўзгаришларни ҳам таклиф қилди. Унга кўра, ҳозирда кўплаб хусусий клиникалар 4 фоизлик айланма солиғи тўлайди ва ўз айланмаси 1 млрд сўмдан ошмаслигига ҳаракат қилмоқда.
Абдулла Азизовнинг айтишича, бу таклиф Президент қарори лойиҳасида ҳам мавжуд. 2025 йилдан бошлаб дори воситалари ва фармацевтика маҳсулотлари билан шуғулланувчи барча компаниялар ҚҚС тўловчига айланиши режалаштирилган.
