Россия Федерацияси Давлат Думаси хорижий фуқароларни депортация қилиш учун янги миграция режимини жорий қилувчи қонун лойиҳасини қабул қилди. Россия Федерацияси Ички ишлар вазирлиги томонидан ишлаб чиқилган ҳужжат мамлакатда бўлиш қоидаларини бузган хорижликлар устидан назоратни кучайтиришга қаратилган.
Янги қонуннинг асосий қоидалари:
Ҳаракатни чеклаш: уларга нисбатан депортация режими жорий этиладиган шахслар ички ишлар органлари рухсатисиз Россия ҳудудида яшаш жойини ёки бўлиш жойини ўзгартира олмайди. Шунингдек, уларга яшаш жойидан ташқарига чиқиш, транспорт воситасини бошқариш, мулк сотиб олиш ёки турмуш қуриш тақиқланади.
Назорат қилинадиган шахслар реестрига киритиш: бундай хорижликлар тўғрисидаги маълумотлар давлат органлари, юридик ва жисмоний шахслар учун очиқ бўлади. Кредит ташкилотлари ушбу рўйхатдаги шахсларнинг операциялари, ҳисобварақлари ва депозитлари тўғрисидаги маълумотларни тақдим этишлари шарт.
Жамоат ва диний фаолиятда иштирок этишни тақиқлаш: назорат қилинадиган шахслар реестрига киритилган шахслар жамоат ёки диний ташкилотларга аъзо ёки муассис бўла олмайди.
Никоҳни текшириш: ФҲДЁ органлари никоҳга кирувчи барча чет элликлар ва фуқаролиги бўлмаган шахсларни назорат қилинадиган шахслар рўйхатига киритилганини текшириши шарт.
Чегарадан ҳақиқий бўлмаган ҳужжатлардан фойдаланган ҳолда ўтиш: истисно ҳолларда, чет эл фуқароларининг шахсини аниқлаш имконини берадиган бўлса, муддати ўтган ёки техник носозлиги бўлган ҳужжат орқали чегарадан ўтишга рухсат берилади.
Мавжуд назорат чоралари билан бир қаторда бир нечта янгиларини ҳам киритиш таклиф этилади:
Хорижлик фуқаронинг жойлашган жойини аниқлаш;
Техник воситалардан, жумладан, геолокациядан фойдаланиш;
Назорат остидаги шахсга тегишли ҳар қандай ҳужжатларни, шу жумладан солиқ ёки банк сирларини ўз ичига олган ҳужжатларни текшириш;
Чегара пунктигача бўлган йўналишни мувофиқлаштириш.
Шунингдек, қонун лойиҳасида хорижликларнинг Россияда бўлиш муддатини йил давомида 90 кунгача қисқартириш таклиф қилинган. Бундан ташқари, Давлат Думаси ички ишлар органларига миграция қонунчилигини бузган чет элликлар ва фуқаролиги бўлмаган шахсларни мамлакатдан чиқариб юбориш ҳуқуқини беришни қўллаб-қувватлади. Депортация қилинган шахслар махсус муассасага 48 соатдан ортиқ бўлмаган муддатга жойлаштирилиши мумкин.
Янги қонун миграция оқими устидан назорат самарадорлигини ошириши ва Россия фуқароларининг хавфсизлигини таъминлаши кутилмоқда.
