Бугун, 8 август куни Ўзбекистон президенти Шавкат Мирзиёевнинг кенжа қизи Шаҳноза 38 ёшни қарши олди.
Шаҳноза Мирзиёева 1986 йилда Тошкент шаҳрида туғилган. Педагогика фанлари номзоди. Шунингдек, у ҳуқуқ ва жаҳон иқтисодиёти бўйича магистрлик даражасига эга.
У 2017 йилдан бошлаб Ўзбекистон Республикаси Мактабгача таълим вазирлигида ишлаган, у ерда Мактабгача таълим соҳасида сиёсатни шакллантириш ва стратегик ривожлантириш бош бошқармасига раҳбарлик қилган. У, шунингдек, вазирнинг эрта болалар таълимида тенглик ва инклюзивлик масалалари бўйича маслаҳатчиси бўлиб ишлаган.
Шаҳноза Мирзиёева Ўзбекистон мактабгача таълим тизимида муваффақиятли амалга оширилаётган кўплаб инновацион ғоялар муаллифи. Масалан, имконияти чекланган болалар учун «Имкон» реабилитация марказига эга кўп тармоқли ихтисослаштирилган мактабгача таълим ташкилоти лойиҳаси. Унинг ташаббуси билан республика бўйлаб йўлга қўйилган яна бир лойиҳа «Ақлвой» кўчма боғчалари бўлиб, у энг чекка қишлоқлардаги болаларнинг мактабгача таълим хизматларидан мутлақо бепул фойдаланиши ва мактабга тайёрлашга ёрдам беради.
Шаҳноза Мирзиёева Ўзбекистон Республикасида Ижтимоий ҳимоя миллий агентлигини ташкил этиш бўйича ишчи гуруҳига ҳам раҳбарлик қилди.
Ҳозирда у Мансурбек Оллоёров раҳбарлик қилаётган президент ҳузуридаги Ижтимоий ҳимоя миллий агентлиги директорининг биринчи ўринбосари лавозимида ишлаб келмоқда.
2007 йилда Шаҳноза ҳозирда Ўзбекистон Республикаси президенти ҳузуридаги Давлат хавфсизлик хизмати раҳбари ўринбосари лавозимида ишлаб келаётган Отабек Умаровга турмушга чиққан. Жуфтликнинг уч нафар қизи бор: Маърифатхон (2008 йилда туғилган), Меҳрихон (2010 йилда туғилган) ва Раниа (2015 йил).
