Бугун Президент Шавкат Мирзиёев боксчилар Асадхўжа Мўйдинхўжаев ва Лазизбек Муллажонов билан телефон орқали мулоқот қилди. Улар Парижда бўлиб ўтган ёзги Олимпия ўйинларида Ўзбекистон спорт делегацияси ҳисобига яна иккита олтин медаль келтирди ва Ўзбекистоннинг рекорд миқдордаги медалларни қўлга киритишига ҳисса қўшди.
Президентимиз спортчиларни табриклаб, бокс бўйича Ўзбекистоннинг дунёда тенги йўқлигини яна бир бор исботлагани учун уларга миннатдорлик билдирди. Уларни халқимизнинг чинакам қаҳрамонлари ва Янги Ўзбекистон ёшлари учун буюк ибрат, деб атади.
«Спортчиларимиз нималарга қодир эканини бутун дунё ҳамжамияти кўрди ва мен сизлар билан фахрланаман», — деди давлат раҳбари.
Президентимиз йигитларимизнинг кечаги ғалабалари бутун халқни хурсанд қилганини ҳам таъкидлади. У юқори натижаларга эришаётган олимпиячиларга ва бутун жамоага самимий саломларни етказди.
Ўз навбатида чемпионлар ҳам президент ва халқ ишончини оқлаганликларидан мамнунликларини билдирдилар. Бундай ғалабаларни қўлга киритиш имконини бераётган эътибор ва кенг имкониятлар учун давлат раҳбарига миннатдорлик билдириб, бундан буён ҳам Ватан байроғини баланд кўтариб юришга ваъда берди.
