Ўзбекистон ахборот агентлиги (ЎзА) Собира Холдорова исмли сунъий интеллектга асосланган виртуал мухбирни ишга туширди.
Собира сўнгги янгиликларни тўққиз тилда ўқиб беради: ўзбек, инглиз, рус, француз, араб, хитой, немис, испан ва қозоқ тилларида.
Сунъий интеллект яратиш учун журналист Дилдора Абдухалилованинг прототипидан фойдаланилган.
Мухбирга Собира Холдорова деган исм бежиз қўйилмаган. У Марказий Осиё ва Ўзбекистондаги биринчи профессионал аёл журналист бўлган.
Сунъий интеллектдан фойдаланган ҳолда видеоҳисоботларни яратиш жуда катта имкониятдир, лекин у маълум хавфларни ҳам ўз ичига олади. Ҳужумчилар ёлғон ва сохта янгиликлар асосида видеолар яратиши ва уларни агентлик номидан тарқатиши мумкин. Шу боис ЎзА номидан сохта видеолар тарқатилса, уларнинг ҳақиқийлигини текшириш мумкин. Бунинг учун ҳар бир видеога махсус QR-код жойлаштирилади. Ҳаволани фаоллаштирган ҳолда ушбу видеолавҳа матни билан ЎзА расмий сайтида танишиш мумкин. Агар сунъий интеллект ёрдамида яратилган видеода QR-код бўлмаса ёки ҳавола ЎзА сайтига олиб бормаса, бу видео сохтадир, дейилади агентлик хабарида.
