Президент Шавкат Мирзиёев Ўзбекистон мустақиллигининг 33 йиллигига бағишланган тантанали маросимда нутқ сўзлади. Унинг айтишича, қийинчилик ва муаммоларга қарамай, мамлакат демократик ислоҳотларни давом эттиради.
«Ҳаёт қанчалик машаққатли бўлмасин, мамлакатимизда демократик ислоҳотларни изчил давом эттириб, халқимизни рози қилишга, тинчлик ва барқарорликни мустаҳкамлашга бор куч ва имкониятларимизни сафарбар этамиз», — деди Мирзиёев.
Шунингдек, Қуролли Кучларни замонавий турдаги қурол-яроғ ва техника билан таъминлаш, уларнинг жанговар ва маънавий салоҳиятини юксалтиришга алоҳида эътибор қаратилиши таъкидланди.
«Бу барчамизнинг, ҳар бир Ўзбекистон фуқаросининг муқаддас бурчи бўлиши шарт. Юртнинг кучи — бирликда, қадри эса тинчликдадир», — деди президент.
Ҳозирги кунда Янги Ўзбекистонни барпо этишда асосий эътибор 5 та устувор йўналишга қаратилаётгани таъкидланди:
Сифатли таълим тизимини йўлга қўйиш;
Бизнесни ривожлантириш;
Коррупциядан холи, адолатли суд тизимини яратиш;
Соғлиқни сақлаш соҳасини тубдан яхшилаш;
Экологик барқарорликни таъминлаш.
Бундан ташқари, она тили ва адабиётини чуқур ўрганишга алоҳида эътибор қаратилмоқда. Шу мақсадда чет элдан она тилида сўзлашувчилар ишга таклиф этилади.
«Юртимизда дунёдаги нуфузли олийгоҳларнинг филиалларини очиб, Ўзбекистонни йирик таълим марказига айлантиришни мақсад қилганмиз. Ёшларимиз етакчи хорижий университетларда таҳсил олиб, тажриба орттириб, Ватан равнақи йўлида хизмат қилишга бел боғлаганлар», — деди президент.
Мирзиёев ҳам ёшларга мурожаат қилиб, уларда юрт келажагини, барча эзгу ниятлар тимсолини кўришини таъкидлади. Уларга турли соҳаларда юксак марраларни забт этишларини, муваффақиятлари билан Ўзбекистонни бутун дунёга тараннум этишларини тилади.
«Маррани баланд олинг, сиз буюк ишларга қодирсиз! Ҳамиша ўз кучингиз, қатъият ва салоҳиятингизга ишонинг! Давлатимиз, халқимиз, Президент сизларни бу йўлда доимо қўллаб-қувватлайди, ҳар қандай ёрдамни аямайди», — деди Мирзиёев.
