Ўзбекистонликлар хонадонларида ёввойи ҳайвонларни сақлаш масалалари тартибга солинади. Шавкат Мирзиёев қонунчиликдаги бу бўшлиқни бартараф этиш вазифасини юклаб қўйди, деб хабар бермоқда мамлакатнинг президент матбуот хизмати.
19 сентябрь куни экология вазири Азиз Абдуҳакимов Ўзбекистон президентига атроф-муҳитни муҳофаза қилиш ва туризм соҳасида бир қатор таклифларни тақдим этди. Улар орасида фуқароларнинг шахсий хонадонларида ёввойи ҳайвонларни сақлаш масаласи муҳим ўрин эгаллади.
Йиғилишда бу муаммо ҳали ҳеч қандай тартибга солинмагани ва қонунчиликда жиддий бўшлиқ эканлиги таъкидланди. Шу сабабли президент тегишли ҳужжатлар лойиҳаларини пухта ишлаб чиқиш ва уларнинг самарали ижросини таъминлаш бўйича кўрсатма берди.
Хусусан, жисмоний шахсларнинг уйларида ҳамда цирк ва шапитоларда сақланаётган ёввойи ҳайвонларни ҳайвонот боғлари, океанариумлар, питомниклар ва илмий-тадқиқот муассасалари ҳузуридаги реабилитация марказларига топшириш кўзда тутилмоқда.
Агар зарур меъёрий ҳужжатлар қабул қилинса, уй шароитида ва циркларда ёввойи ҳайвонларга эгалик қилиш тақиқланади.
