7-11 октябрь кунлари Экология, атроф-муҳитни муҳофаза қилиш ва иқлим ўзгариши вазири ўринбосари Искандар Қутбиддинов бошчилигидаги делегация Корея Республикаси пойтахти Сеул шаҳрида бўлди. Ташриф давомида Жанубий Кореянинг чиқиндиларни қайта ишлашга ихтисослашган бир нечта компаниялари билан музокаралар ўтказилди, шунингдек чиқиндиларни ёқиш орқали «яшил» энергия ишлаб чиқарувчи корхоналар ўрганилди. Бундан ташқари, делегация Корея Экспорт-импорт банки вакиллари билан ҳам учрашди, деб хабар беради Экология, атроф-муҳитни муҳофаза қилиш ва иқлим ўзгариши вазирлиги.
Шунингдек, Искандар Қутбиддинов Корея Республикаси Атроф-муҳитни муҳофаза қилиш вазирлиги ҳузуридаги Корея экологик корпорацияси (К-eco) раиси Б. Ан билан учрашиш имкониятига эга бўлди. Ушбу учрашувда томонлар ҳамкорликни ривожлантириш истиқболларини муҳокама қилдилар ва экологик хавфсизлик соҳасида тажриба алмашдилар.
Ташрифнинг асосий натижаларидан бири 6,2 миллион долларлик тўрт йиллик грант битими имзоланиши бўлди. Ушбу маблағлар Жиззах вилоятида чиқиндиларни қайта ишлаш заводи қурилишига йўналтирилади.
Лойиҳа чиқинди полигонини рекултиватсия қилиш, 300 минг куб метр чиқинди йиғиш, полигонни тупроқ билан тўлдириш, пиролиз усулида чиқинди газини йиғиш ва ёқиш, шунингдек, электр энергияси ишлаб чиқариш учун ускуналарни ўрнатишни ўз ичига олади.
