Ўзбекистонда электр двигателлар ва шахсий ҳаракатланиш воситалари бўлган кичик транспорт воситаларида содир этилган йўл ҳаракати қоидаларини бузганлик учун маъмурий жавобгарлик жорий этилди.
Ўзбекистон Республикаси Маъмурий жавобгарлик тўғрисидаги кодексининг 136-моддасига кўра, алкоголь, гиёҳванд модда ёки бошқа турдаги мастлик ҳолатини аниқлаш учун тиббий кўрикдан ўтишдан бош тортган скутер, мопед ва бошқа шахсий ҳаракатланиш воситалари ҳайдовчилари базавий ҳисоблаш миқдорининг 3 баравари миқдорида жарима тўлайди.
Агар скутер ёки бошқа шахсий транспорт воситаси ҳайдовчиси алкоголь, гиёҳванд модда ёки бошқа турдаги мастлик ҳолатида йўл ҳаракати қоидаларини бузса, унга ҳам базавий ҳисоблаш миқдорининг 3 баравари миқдорида жарима солинади.
Бундан ташқари, шахсий ҳаракатланиш воситалари ва скутерлар ҳайдовчилари томонидан йўловчи ташиш учун базавий ҳисоблаш миқдорининг 0,5 баравари миқдорида жарима белгиланган.
Ушбу қонунчиликка ўзгартиришлар электр двигателли кичик ҳажмли транспорт воситалари ва шахсий ҳаракатланиш воситаларининг оммалашуви туфайли киритилди. Бу эса улардан фойдаланиш билан боғлиқ йўл-транспорт ҳодисаларининг олдини олиш чораларини кўришни тақозо этади.
