Ижтимоий тармоқларда Андижон вилояти Олтинкўл туманидаги 38-мактаб директорининг «тарбиявий суҳбати» лавҳаси акс этган видео тарқалди.
Видеода бир аёлнинг икки нафар ўқувчига тарсаки урганини кўриш мумкин.
Дастлабки маълумотларга кўра, ҳодиса саккизинчи синф ўқувчиси дарсда пиротехникадан фойдаланганидан кейин содир бўлган.
Вилоят мактабгача ва мактаб таълими бошқармаси ҳолат юзасидан изоҳ берди.
Воқеани ўрганиш бўйича ишчи йиғилиш тузилиб, тергов натижалари бўйича батафсил маълумот берилиши режалаштирилган.
«Андижон вилояти мактабгача ва мактаб таълими бошқармаси зўравонликнинг ҳар қандай шаклини кескин қоралайди ва ўқитувчи ва ўқувчилар ўртасидаги муносабатларда педагогик этика қоидаларига риоя қилиш муҳимлигини таъкидлайди», — дейилади бошқарма баёнотида.
Шунингдек, мазкур ҳолат Бола ҳуқуқлари бўйича омбудсман назорати остида. Ҳозирда ҳолат юзасидан дастлабки тергов ҳаракатлари олиб борилмоқда.
