Ўзбекистон Коррупцияга қарши курашиш агентлиги томонидан ўтказилган ўрганиш давомида Мажбурий ижро бюросининг Шайхонтоҳур тумани бўлими мансабдор шахсларининг ўз вазифаларига совуққонлик билан ёндашиши ва қонун ҳужжатларини бузиши аниқланган. Бюро ходимларининг ҳаракатлари фуқаролар, жамият ва давлатга катта моддий зарар етказгани қайд этилди, деб хабар беради Коррупцияга қарши курашиш агентлиги.
Хусусан, жами 202,9 миллиард сўмлик 200 та ижро иши бўйича ҳуқуқбузарликлар аниқланган. Масалан, «С.Б» МЧЖнинг 19 млрд сўм ва «П.П» МЧЖнинг 179,2 млн сўм солиқ қарздорлиги ижрочиларнинг асоссиз ҳаракатлари сабабли ундирилмаганлиги белгиланган талабларга зиддир.
Шунингдек, «СCГ» МЧЖнинг 26,3 млрд сўмлик, «Р.Ф.П» МЧЖнинг 19,4 млрд сўмлик ва «Я.М.С.Э.Т» МЧЖнинг 1,7 млрд сўмлик давлат қарздорлиги билан боғлиқ ишлар бўйича ҳам ҳуқуқбузарликлар қайд этилган. Ушбу компанияларнинг жойлашган жойи ҳақида аниқ маълумотлар бўлишига қарамай, ижро иши асоссиз равишда якунланган.
Шунингдек, «Б.П.Т» МЧЖ, «П.Э.Э.С» ва «С» МЧЖлар фойдасига ноқонуний равишда жами 1,9 млрд сўм маблағ тўлаб берилган. Бундан ташқари, «М.Т.» МЧЖдан 1,1 млрд сўм АЖ фойдасига, 332 млн сўм қарздор БП фойдасига, 332 млн сўм жиноятлардан етказилган зарар, 6,3 млрд сўм давлат фойдасига ва 331 млн сўм солиқ қарзи ундирилмаган ва ижро ҳаракатлари қонуний асосларсиз тўхтатилган.
Текширув натижасига кўра, Тошкент шаҳар прокуратураси томонидан Ўзбекистон Жиноят кодексининг моддалари асосида жиноят иши қўзғатилган.
