Бугун Тошкентда «Хазон чиқинди эмас, ўғит!» номли экологик акция бошланади. Тадбирни Тошкент шаҳар ҳокимлиги эко-блогер Мўътабар Хушвақтова (Ўрикгули) билан ҳамкорликда ташкил этади.
Ушбу ташаббуснинг асосий мақсади аҳолининг эътиборини табиий ресурсларни асраш ва шаҳарда экологик вазиятни яхшилаш муҳимлигига қаратишдир.
Акция шаҳар аҳолисини тўкилган баргларни ёқмасдан, уларни табиий ўғит сифатида фойдаланишга ундашга қаратилган. «Элбек» боғида йиғилган барглар тупроққа кўмилади ва баҳоргача органик компостга айланади. Бу эса тупроқ сифатини яхшилаш ва дарахтларнинг соғлиғини сақлашга ёрдам беради.
Тадбир 9 ноябрь куни соат 15:00 да «Элбек» боғида ўтказилади ва барча истаганлар иштирок этиши мумкин. Иштирокчилар нафақат экологияга ҳисса қўшадилар, балки Тошкентни кўкаламзорлаштириш ва экологиясини яхшилашга қаратилган ҳаракатни қўллаб-қувватлаш имкониятига эга бўлади.
