Яқинда Қозоғистон ижтимоий тармоқларида фуқаролик турмуш ўртоғини ўлдиргани учун 24 йилга ҳукм қилинган собиқ вазир Қувондиқ Бишимбаевнинг «ғойиб бўлиши» мумкинлиги фаол муҳокама қилина бошланди. Хабарларга кўра, у жазони ўташ жойидан ташқарида ёки унданда даҳшатлиси, озодликда бўлиши мумкин. AIRAN янгиликлар манбасининг маълум қилишича, суддан сўнг Бишимбаев Аршали қишлоғи яқинидаги колонияга жўнатилиши керак эди, аммо у ерга борган суратга олиш гуруҳи уни топа олмаган, дея хабар беради ORDA Kazakhstan ахборот-таҳлилий портали мухбири.
Бу янгилик ижтимоий тармоқларда турли тахминлар тўлқинини келтириб чиқарди: баъзилар собиқ амалдор аллақачон мамлакатни тарк этган, деб ҳисоблашмоқда. Бироқ Қозоғистон Жиноят-ижроия тизими қўмитаси (ЖИТҚ) бу миш-мишларни инкор этди.
«Мазкур маҳкум жазони юқори хавфсизлик даражасидаги муассасада ўтамоқда. Шунингдек, маълум қиламизки, нотўғри маълумотлар тарқатилганлиги сабабли жиноий иш қўзғатилди ва айбдорлар жавобгарликка тортилади», — дейилади идора баёнотида.
Шунга қарамай, савол туғилмоқда: агар Бишимбаев Аршалида бўлмаса, у айнан қаерда?
Бу саволга озодликдан маҳрум этиш жойларига тез-тез ташриф буюрадиган ҳуқуқ ҳимоячиси Бауржан Мусин жавоб берди. Унинг айтишича, Бишимбаев Аршали қамоқхонасида бир кун ҳам бўлмаган ва Степногорскдаги 5-сонли муассасада сақланмоқда.
«У тўртинчи отрядда. Қозоғистонда жазони ўташ жойини танлаш хоналарнинг тўлдирилиш даражасига ҳам боғлиқ. Маҳкумнинг қаэрда ўтириши ҳақида фақат унинг қариндошларига хабар берилади. ЖИТҚ бу маълумотни жамоатчиликка етказиши шарт эмас», — дея тушунтирди Мусин.
