Президент Шавкат Мирзиёев Бокуда (Озарбайжон) бўлиб ўтаётган БМТнинг Иқлим ўзгариши тўғрисидаги ҳадли конвенцияси Томонлари конференциясининг 29-сессиясида нутқ сўзлади. Бу ҳақда давлат раҳбари матбуот хизмати хабар берди.
Давлат раҳбари ўз нутқида бир нечта ташаббусларни илгари сурди.
Президент иқлим ўзгаришидан зарар кўраётган йирик шаҳарлар ва шаҳарларни барқарор ривожлантириш бўйича илғор билим ва тажрибаларни узатиш учун Жаҳон иқлим пойтахтлари иттифоқини таъсис этиш ва унинг биринчи форумини Тошкентда ўтказиш ташаббусини илгари сурди.
Шавкат Мирзиёев CОP29 давлатлари вакилларини келгуси йил 15 май куни Оролбўйи минтақасида бўлиб ўтадиган рақамли «яшил» ташаббуслар глобал ёшлар фестивалида иштирок этишга таклиф қилди.
Шунингдек, ривожланаётган мамлакатлар дуч келаётган иқлим муаммоларини аниқлаш учун етакчи давлатлар ва халқаро ташкилотларнинг техник кўмагини кенгайтириш мақсадида Иқлим йўқотишлари ва зарарини баҳолаш халқаро марказини таъсис этиш таклиф этилди.
Трансчегаравий сув ресурсларининг ифлосланишини олдини олиш ва барқарор биологик хилма-хилликни сақлаш масалаларида ягона ёндашувларни ишлаб чиқиш зарурлигини таъкидлаб, давлатимиз раҳбари БМТ ҳомийлигида Дарё экотизимлари саломатлиги ва экологик хавфсизлигини таъминлаш бўйича мажбуриятлар тўғрисидаги декларацияни ишлаб чиқишни таклиф этди.
Шунингдек, Ўзбекистонда ўсимликларнинг иқлим ўзгаришига чидамлилигини ошириш учун минтақавий генетик ресурслар банки ва денгизга чиқиш имконияти бўлмаган давлатлар учун БМТнинг инновацион агросаноат маркази ташкил этиш таклиф этилди.
