Сурхондарё вилояти Бандихон туманида фожиали йўл-транспорт ҳодисаси содир бўлди. 12 ноябрь куни эрталаб соат 8:00 да Nexia ҳайдовчиси йўлни белгиланмаган жойдан кесиб ўтаётган 7 ёшли болани уриб юборди, деб хабар бермоқда вилоят ИИБ матбуот хизмати.
Йўл-транспорт ҳодисаси оқибатида бола жиддий тан жароҳати олиб, шифохонага ётқизилди. Шифокорларнинг барча саъй-ҳаракатларига қарамай, бола вафот этди. Таъкидлаш жоизки, автомобиль ҳам йўлдан чиқиб кетиб, ағдарилди. Ҳайдовчининг аҳволи ҳақида маълумот берилмади.
Ҳалок бўлган бола таҳсил олган мактабда ўқувчилар ва уларнинг ота-оналари билан профилактик суҳбат ўтказилди. Ҳайдовчилар йўлларда эҳтиёткор бўлишга, ота-оналар эса фарзандларини қаровсиз қолдирмасликка чақирилди.
Ҳозирда мазкур ҳодиса юзасидан дастлабки тергов ҳаракатлари олиб борилмоқда.
