Жиноят ишлари бўйича Миробод туман судида «E. E.» нодавлат таълим муассасасидаги робототехника тўгараги раҳбари, учинчи синф ўқувчи қизларига нисбатан ахлоқсиз хатти-ҳаракатлар содир этишда айбланган 65 ёшли шахсга нисбатан иш кўриб чиқилди.
Иш материалларига кўра, айбланувчи машғулот давомида қизларнинг қўл, оёқ ва танасига тегиб, уларни кўтариб-тушириб, шу орқали одобсиз ҳаракатларни амалга оширган.
Судда таълим муассасаси директори ўқувчи қизлар ва уларнинг ота-оналари билан суҳбат ўтказганини маълум қилди. Психолог сифатида қизлар билан суҳбатлашгандан сўнг, у ўқитувчининг хатти-ҳаракатларида бегуноҳ эркалаш эмас, балки жинсий тазйиқ белгилари мавжуд деган хулосага келган.
Эркак судда бу ҳаракатлар тасодифан содир бўлганини, ўз хатти-ҳаракатининг нотўғри ва ўқитувчининг касбий одоби тамойилларига зид эканлигини тушуниб етганини изоҳ берди. У қилмишидан пушаймонлигини билдирди, бундай ҳодисалар қайтарилмаслигига ваъда берди ҳамда суддан енгиллик сўради.
Суд эркакни Ўзбекистон Республикаси МЖтКнинг 41-1-моддаси 1-қисмида (Жинсий тазйиқ) назарда тутилган ҳуқуқбузарликни содир этганликда айбдор деб топди ва унга 5 суткалик маъмурий қамоқ жазоси тайинлади.
