2023 йилда ўртача ҳар 10 дақиқада бир аёл ёки қиз турмуш ўртоғи ёки оила аъзолари томонидан содир этилган қотилликнинг қурбони бўлган.
БМТнинг «Аёллар» тузилмаси ва БМТнинг Наркотиклар ва жиноятчилик бўйича бошқармаси томонидан эълон қилинган ҳисоботда бундай жиноятларнинг умумий сони тахминан 51 мингтани ташкил этгани, бу эса 2022 йилдаги кўрсаткичдан (48 800 қурбон) ошгани қайд этилган.
Мутахассислар қайд этилган ҳолатлар сонининг кўпайишини зўравонлик даражасининг ошиши эмас, балки маълумотларни тўплаш сифатининг яхшиланиши билан изоҳлайдилар. Бироқ, кўрилаётган чора-тадбирларга қарамай, гендер зўравонлиги даражаси хавотирли даражада юқорилигича қолмоқда.
Бундай қотилликлар сони бўйича Африка етакчилик қилмоқда - 2023 йилда 21 700 ҳолат, бу ҳар 100 минг кишига 2,9 қурбонни ташкил қилади. Юқори кўрсаткичлар Америка (ҳар 100 мингга 1,6) ва Океанияда (ҳар 100 мингга 1,5) ҳам қайд этилган. Осиё ва Европада бу рақамлар ҳар 100 минг кишига мос равишда 0,8 ва 0,6 ни ташкил этади.
Ҳисоботда таъкидланишича, аёллар хусусий соҳада зўравонликдан номутаносиб равишда азият чекмоқда, эркаклардан фарқли ўлароқ, улар кўпинча уйдан ташқарида қотиллик қурбонига айланади. 2023 йилда ўлдирилган аёлларнинг қарийб 60 фоизи ўз турмуш ўртоғи ёки қариндошлари томонидан ҳалок бўлган. Эркаклар учун бу кўрсаткич анча паст.
Ҳисобот муаллифлари зўравонлик ҳолатларини эрта аниқлаш ва фожиали оқибатларнинг олдини олиш учун ўз вақтида чоралар кўриш зарурлигини таъкидладилар.
Ҳужжат 25 ноябрь — Халқаро хотин-қизларга нисбатан зўравонликка барҳам бериш куни арафасида эълон қилинди. 2024 йилда ушбу сана эълон қилинганига 25 йил тўлади.
