Ўзбекистонда Андижон машинасозлик институти, Андижон иқтисодиёт ва қурилиш институти ҳамда Тошкент тўқимачилик ва енгил саноат институтининг Андижон факультети негизида Андижон давлат техника институти ташкил этилмоқда. Тегишли қарор президент томонидан 2024 йил 18 ноябрда имзоланган.
Янги институт асосий эътиборни автомобилсозлик, энергетика, қурилиш, тўқимачилик ва бошқа муҳим соҳаларда мутахассислар тайёрлашга қаратади. 2025/2026 ўқув йилидан бошлаб «Энергетика муҳандислиги», «Сунъий интеллект», «Мехатроника ва робототехника» йўналишлари бўйича талабалар сонини ошириш режалаштирилган. Ўқув жараёни билимларни баҳолаш ва ўқитишнинг халқаро стандартларига мувофиқ ташкил этилади.
Шунингдек, «ягона дарча» тамойили асосида талабаларни қўллаб-қувватлаш тизимини яратиш ва иқтидорли талабаларни хорижий тилларда ўқитиш кўзда тутилган. Қайта ташкил этилаётган муассасаларда таҳсил олаётган талабалар янги институтда ўқишни давом эттиради, 2024/2025 ўқув йили битирувчилари эса Андижон давлат техника институти дипломини олади.
