Хитойнинг Alibaba компанияси мураккаб мантиқий ва математик масалаларни ечишга қодир QwQ-32B-Preview сунъий интеллект моделини эълон қилди. 32,5 миллиард параметрга эга тизим 32 минг сўзгача бўлган сўровларни қайта ишлайди ва синовларда ажойиб натижаларни кўрсатади, деб хабар бермоқда TechCrunch.
TechCrunch маълумотларига кўра, модель бир қатор муҳим кўрсаткичлар бўйича о1-превиЭw ва о1-мини каби OpenAI аналогларидан устун туради. Хусусан, QwQ-32B-Preview сунъий интеллектнинг матнли масалаларни ечиш ва бошқа тизимлар билан ўзаро алоқада бўлиш қобилиятини баҳоловчи AIME ва MATH синовларида юқори самарадорликни намойиш этди.
Моделнинг ўзига хос хусусиятларидан бири унинг «ўзини ўзи текшириш» қобилияти бўлиб, бу хатолардан қочишга ёрдам беради, аммо маълумотларни қайта ишлаш жараёнини секинлаштиради. OpenAI тизимлари сингари, Алибабанинг янги модели ҳам оралиқ натижаларни таҳлил қилган ҳолда вазифаларни босқичма-босқич ҳал қилади.
Очиқлик ҳақидаги баёнотга қарамай, модель фақат қисман мавжуд. Унинг таркибий қисмларини Apache 2.0 лицензияси остида Hugging Face платформасидан юклаб олиш мумкин, бу тижорий фойдаланиш имконини беради, аммо ички алгоритмлар мавжуд эмас. Шундай қилиб, QwQ-32B-Preview тўлиқ очиқ ва ёпиқ ишланмалар ўртасида оралиқ ўринни эгаллайди.
Моделнинг Хитойда яратилганлиги маълум чекловларни келтириб чиқарди. У маҳаллий назорат органи талабларига мувофиқ ишлаб чиқилган ва Хитой билан боғлиқ сиёсий характердаги саволларга жавоб бермайди.
Мутахассисларнинг таъкидлашича, QwQ-32B-Preview нинг пайдо бўлиши сунъий интеллектни ривожлантиришда янги ёндашувларнинг муҳимлигини кўрсатмоқда. Ҳисоблаш қувватларини кенгайтиришга асосланган тараққиётнинг секинлашиши фонида ишлаб чиқувчилар «бажариш босқичидаги ҳисоблашлар» (test-time compute) каби тушунчаларни ўрганмоқдалар. Google каби компаниялар томонидан фаол қўллаб-қувватланаётган ушбу технологиялар сунъий интеллектнинг келажагини белгилайди.
