Ўзбекистоннинг Фавқулодда ва мухтор элчиси Равшанбек Алимов Ашхободга келди.
58 ёшли дипломат Бауман номидаги Москва давлат техника университети, Ўзбекистон Президенти ҳузуридаги Давлат бошқаруви академияси ва Жоржтаун университетини (АҚШ) тамомлаган.
Меҳнат фаолиятини 1990 йилда Ташқи иқтисодий алоқалар вазирлиги (ҳозирги Инвестициялар, саноат ва савдо вазирлиги) тизимида минтақавий даражада бошлаган. Президент девонида, Бош вазир котибиятида, шунингдек, Макроиқтисодиёт ва статистика вазирлигида бошқарма бошлиғи лавозимларида ишлаган.
Равшанбек Алимов 2002-2008 йилларда Ўзбекистоннинг Украина, Молдова, Франция ва Португалиядаги элчиси лавозимларида ишлаган.
У 2008 йилдан буён ТИВ тизимида ишлайди. Узоқ йиллар давомида Москвадаги элчихонада маслаҳатчи, Ташқи ишлар вазирлиги марказий аппаратида бўлим ва бошқарма бошлиғи бўлиб ишлаган.
2020 йилда сенатор этиб сайланган Р. Алимов Олий Мажлис Сенатининг Халқаро муносабатлар, ташқи иқтисодий алоқалар, хорижий инвестициялар ва туризм қўмитаси раиси этиб тайинланди.
Равшанбек Алимов 2016 йилдан 2024 йилгача Ўзбекистоннинг Ашхободдаги элчиси лавозимида ишлаган Акмал Қўчқоров ўрнини эгаллади.
