Rossiyalik diyetolog-endokrinolog Anastasiya Kalmurzina kimlar xurmoni, ayniqsa og‘izni burushtiradigan navlarini cheklashi yoki butunlay iste’mol qilmasligi kerakligi haqida gapirdi. RIA Novosti bilan suhbatda mutaxassis rezavor mevaga og‘izni burushtiradigan ta’mni po‘stlog‘idagi oshlovchi moddalar - taninlar berishini tushuntirdi. Ularning ko‘pligi buyrak, oshqozon-ichak trakti (OIT) va jigar intoksikatsiyasi bilan bog‘liq muammolarni keltirib chiqarishi mumkin.
Kalmurzinaning aytishicha, taninlarni iste’mol qilish vitamin va minerallarning so‘rilishini qiyinlashtirishi, shuningdek qabziyatni keltirib chiqarishi mumkin.
“Taninlar ovqat hazm qilish traktida parda yoki yopishqoq massa hosil qiladi. Bu ayniqsa uch yoshgacha boʻlgan bolalar, surunkali qabziyati bor odamlar, kuchayish bosqichidagi gemorroyi borlar, shuningdek oshqozon yoki ichakda operatsiya qilinganlar uchun xavfli. Bunday hollarda xurmoni ovqatlanish ratsionidan butunlay chiqarib tashlash kerak”, — dedi ekspert.
Og‘izni burushtiradigan ta’mni yo‘qotish uchun diyetolog quyidagilarni maslahat berdi:
xurmoni bananlar bilan saqlash, bu pishishini tezlashtiradi;
mevani iliq suvda 10-12 soat ivitib qo‘yish;
muzlatkichga solish, garchi muzdan tushirilgandan keyin tuzilishi kamroq yoqimli bo‘lsa ham.
Xurmo va kasalliklar
Xurmo siydik haydovchi ta’sirga ega, bu shish va suyuqlik ushlanib qolishida foydali. Biroq piyelonefrit, sistit va buyrakning boshqa kasalliklari zo‘raygan paytda mevani haftasiga 1-2 donagacha cheklash kerak.
Xurmoga allergik reaksiyalar statistikasi mavjud bo‘lmasa-da, u tarkibidagi yodga sezgirligi yuqori bo‘lgan odamlar uchun allergen bo‘lishi mumkin.
Xurmo va qand miqdori
Xurmoning shirinligi naviga qarab farqlanadi: masalan, "korolek" eng shirin, "xitoy" xurmosi esa kamroq shakarli. Biroq u har qanday ko‘rinishda 100 grammida 16-25 gramm shakar saqlaydi, bu esa qandli diabeti bor odamlar uchun, ayniqsa dekompensatsiya bosqichida, istе’mol qilish nomaqbul ekanligini anglatadi.
“Qandli diabeti bor bemorlar uchun qon tarkibidagi qand miqdori yuqori bo‘lsa, xurmo tavsiya etilmaydi. Nazorat qilinadigan ko‘rsatkichlarda haftasiga bir dona meva yeyish mumkin”, — deya ta’kidladi Kalmurzina.
Sogʻlom odamlarga diyetolog haftasiga koʻpi bilan 1-2 dona xurmo yeyish mumkinligini aytgan.
