AQSH prezidenti Jo Bayden ikki jinoiy ish boʻyicha hukm kutayotgan oʻgʻli Xanter Baydenni afv etdi.
“Bu lavozimda ishlagan birinchi kunimdan boshlab Adliya vazirligi qarorlariga aralashmasligimni aytganman va oʻgʻlimni tanlab va adolatsiz taʼqib qilayotganlarini koʻrganimda ham soʻzimda turdim”, — deyiladi Bayden bayonotida.
Sentyabr oyida Baydenning oʻzi ham, uning matbuot kotibi ham oʻgʻlini afv etish toʻgʻrisida farmon chiqarmasligini taʼkidlagan edi. Iyun oyida sud maslahatchilari 54 yoshli Xanter Baydenni 2018-yilda qurol sotib olayotganda giyohvandligini yashirganlikda aybdor deb topishdi. Kichik Bayden AQSH tarixida amaldagi prezidentning jinoyatda aybdor deb topilgan birinchi oʻgʻli boʻldi.
Keyinchalik, sentyabr oyida Xanter Bayden boshqa ishda - soliq toʻlashdan boʻyin tovlashda oʻz aybini tan oldi.
Yakshanba kuni kechqurun eʼlon qilingan bayonotda Jo Bayden oʻgʻli ustidan oʻtkazilgan sudlar “siyosat bilan zaharlangan” va shu sababli adolatsiz qarorlar bilan yakunlanganini taʼkidladi.
“Dam olish kunlarida bu qarorni qabul qilganimda, uning ijrosini keyinga qoldirishning maʼnosi yoʻq edi. Umid qilamanki, amerikaliklar ota va prezident sifatida nima uchun bunday qarorga kelganimni tushunishadi”, — deyiladi bayonotda.
Xanter Bayden ham bayonot berdi, unda u giyohvandlik paytida yoʻl qoʻygan xatolaridan Baydenlar oilasini jamoat oldida kamsitish va sharmanda qilish uchun siyosiy maqsadlarda foydalanilganini aytdi.
“Menga nisbatan bugungi shafqat harakatini hech qachon oʻz-oʻzidan tushunarsiz deb hisoblamayman va hayotimni hali ham kasal va azob chekayotganlarga yordam berishga bagʻishlayman”, — dedi prezidentning oʻgʻli.
Xanter Baydenga nisbatan hukmlar 12 va 16-dekabr kunlari chiqarilishi kerak edi. Ikkinchi ish boʻyicha, 2016-2019-yillarda 1,4 million dollar soliq toʻlashdan boʻyin tovlaganlikda ayblanib, unga 17 yilgacha qamoq jazosi tahdid solayotgan edi.
Jo Bayden qarindoshini afv etgan birinchi AQSH prezidenti emas.
Bill Klinton 2001-yilda, ikkinchi muddatining oxirida, 1985-yilda kokain saqlagani uchun sudlangan oʻgay akasi, aktyor va musiqachi Rojer Klintonni afv etgan.
Donald Tramp 2020-yilda qizi Ivankaning qaynotasi Charlz Kushnerni afv etgan. U 2005-yilda saylovoldi kampaniyalariga noqonuniy xayriya qilganligi va soliq toʻlashdan boʻyin tovlaganligi uchun sudlangan va ikki yil qamoqda oʻtirgan edi.
Hozir Tramp saylovoldi kampaniyalari uchun katta miqdorda xayriya qilgan Kushnerni Fransiyaga elchi etib tayinlamoqchi.
