Bola huquqlari boʻyicha vakil Samarqand viloyatidagi taʼlim muassasalarida yoʻlbars pitoni namoyishi bilan bogʻliq hodisa yuzasidan surishtiruv boshladi. Ushbu harakat Oʻzbekiston qonunchiligiga zid boʻlib, bolalar uchun xavf tugʻdiradi, deya xabar berdi Bolalar ombudsmani idorasi.
Eslatib oʻtamiz, bir kun avval Ishtixon tumanida Xalqaro Qizil kitobga kiritilgan piton olib qoʻyilgandi.
Bolalar ombudsmani holatga huquqiy baho berishni talab qildi. Maʼlum boʻlishicha, shunday tomoshalardan biri 2024-yil 24-oktyabr kuni Qoʻshrabot tumanidagi bogʻchada boʻlib oʻtgan boʻlib, unda 60 nafar bola ishtirok etgan. Piton egasining 31-dekabrgacha tomoshalar oʻtkazishga ruxsatnomasi bor edi, ammo bolalar bilan ilon oʻynash unga kirmasdi.
Shuningdek, tumandagi yana sakkizta umumtaʼlim maktabida 840 nafar oʻquvchi ishtirokida shunday “tomoshalar” oʻtkazilgani maʼlum.
Hozirda Bola huquqlari boʻyicha vakil mintaqa maʼmurlari bilan hamkorlikda bunday chiqishlarga yoʻl qoʻygan shaxslarga qarshi choralar koʻrish, shuningdek, kelajakda bunday noqonuniy xatti-harakatlarning oldini olish ustida ishlamoqda.
