AQSH federal apellyatsiya sudi ByteDance kompaniyasiga TikTokni sotishni majbur qiladigan qonunni qoʻllab-quvvatladi, aks holda platformaning mamlakat hududida faoliyati taqiqlanadi. TikTok bu qaror yuzasidan Oliy sudga shikoyat qilish niyatini bildirdi.
Sud taʼkidlashicha, qonun har ikkala partiya — respublikachilar va demokratlarning hamkorlikdagi faoliyati natijasi boʻlib, Xitoy bilan bogʻliq milliy xavfsizlikka tahdidlarga qarshi kurashish choralarining bir qismi hisoblanadi.
AQSH Adliya vazirligining fikricha, Xitoy TikTok orqali amerikalik foydalanuvchilar isteʼmol qiladigan axborotga sezdirmay taʼsir oʻtkazishi mumkin.
Oʻz navbatida, XXRning Vashingtondagi elchixonasi qonunni “tijorat talonchiligi harakati” deb baholadi va AQSHni ushbu vaziyatga ehtiyotkorlik bilan yondashishga chaqirdi.
