Oʻzbekiston diplomatlari Fransiyaning Campus France agentligi bosh direktori Donaten Hissar bilan uchrashib, taʼlim sohasidagi hamkorlik istiqbollarini muhokama qildilar.
Fransiya tomoni Oʻzbekiston bilan hamkorlikni rivojlantirishdan manfaatdorligini bildirib, Toshkentda tashkil etilayotgan Oʻzbekiston–Fransiya universiteti ikki mamlakat oʻrtasidagi talabalar almashinuvini mustahkamlashda muhim qadam boʻlishini taʼkidladi.
Shuningdek, Fransiya vakillari 2025-yilda Oʻzbekistonda oʻtkaziladigan uchinchi Oʻzbekiston–Fransiya taʼlim forumini tashkil etishga koʻmaklashishga tayyor ekanliklarini maʼlum qildi.
Muhokama davomida tomonlar forum kun tartibiga ikki mamlakat oliy taʼlim muassasalari uchun dolzarb mavzularni kiritishga kelishib oldi. Iqlim oʻzgarishi, ekologiya, barqaror rivojlanish masalalariga, shuningdek, talabalarning koʻnikma va bilimlarini oshirishga qaratilgan qoʻshma loyihalarga alohida eʼtibor beriladi.
